Wiyétnam kommunistliri wekilliri Uyghur élide ziyarette boldi

Xitayning “Tengritagh tori”, “Shinjang géziti” tori 21-awghust chiqarghan xewerge qarighanda, wiyétnam kompartiyesi “40 Yilliq islahat rehberlik komitéti” wekilliri ömiki Uyghur élige ziyaretke kélip, ma shingrüy qatarliqlar bilen körüshken.

Ikki terep söhbitide, wiyétnam wekilliri xitaygha ziyaretke kélishidiki meqsitining xitayning islahat we tereqqiyat tejribilirini öginip, wiyétnamning yéngiliq yaritip ilgirilesh qedimini tézlitish ikenlikini bildürgen. Ular bu qétim Uyghur élige kélip, xitay kompartiyesining “Shinjangni tüzesh we tereqqiy qildurush, milletler ittipaqliqini ilgiri sürüsh, xelq turmushini yaxshilash” tejribilirini öginish hemde bu rayon bilen bolghan iqtisad we medeniyet alaqisini kücheytish arzusining barliqini bildürüshken.

Buningdin ilgiri, 15-we 16-awghust künliri kambodzha padishahi norodum sixamoni Uyghur élide ziyarette bolup, Uyghur aptonom rayonluq partkomning sékrétari ma shingrüy qatarliqlar bilen körüshken bolup, xitayning “Shinjang hékayisini yaxshi sözlesh” diplomatiyeside pewqul'adde rol alghanidi.

Yuqiriqi xewerlerdin, xitay kompartiyesining döletni mustebitlik bilen bashqurush we Uyghur élidiki irqiy qirghinchiliq siyasitini “Az sanliq milletlerni bashqurush modéli” qilip körsitish diplomatiyesining etraptiki kommunist yaki mustebit döletlerge az-tola tesir körsitiwatqanliqi, shundaqla u döletlerningmu xitayning siyasitidin ilham éliwatqanliqi körülmekte.