Xelq'ara emgek teshkilati Uyghur mejburiy emgikini nishan qilghan yéngi yétekchi qollanmisi maqullighan

Washin'gtondin muxbirimiz erkin teyyarlidi
2024.04.19

Xelq'ara emgek teshkilati özining Uyghur mejburiy emgikini nishan qilghan yéngi yétekchi qollanmisini maqullighan.

Melum bolushiche, bu xelq'ara emgek teshkilatining tunji qétim dölet hamiyliqidiki mejburiy emgek uqumini özining yétekchi qollanmisigha kirgüzüshi iken. Bu heqtiki analizlarda, xelq'ara emgek teshkilatining yéngi yétekchi qollanmisi mejburiy emgekni ölchesh we uqumlashturushning yéngi hem mejburlash ölchemlirini otturigha qoyghanliqi, uning “Ixtiyariy bolmighan mejburiy emgekning birlikke kelgen yadroluq yéngi körsetküchliri” ge éniqlima bérilgenliki qeyt qilinmaqta. Amérikadiki “Kommunizm qurbanliri xatire fondi” ning xitay tetqiqat ishliri diréktori, nopuzluq lagér we Uyghur mejburiy emgiki mutexessisi doktor adriyan zénzning 18-aprél X ta, yeni burunqi tiwittérda élan qilghan bu heqtiki analizida körsitishiche, xelq'ara emgek teshkilaning dölet hamiyliqidiki mejburiy emgekni özining yétekchi qollanmisigha kirgüzüshi zor qedem iken.

Adriyan zénz, xelq'ara emgek teshkilatining yétekchi qollanmisida Uyghurlarning nami tilgha élinmighan bolsimu, emma uning Uyghur mejburiy emgikige qaritilghanliqi, “Emgek küchlirini yötkesh” atalghusining töt yerde tilgha élin'ghanliqi, chünki “Emgek küchlirini yötkesh” dunyada peqet xitayla keng qollinidighan mexsus uqum ikenlikini éytqan. Melum bolushiche, xelq'ara emgek teshkilati özining yéngi yétekchi qollanmisini tüzüshte adriyan zénzning Uyghur mejburiy emgikige da'ir tetqiqat doklatliridin keng paydilan'ghan. Xewerlerde, xelq'ara emgek teshkilatining ilgiri doktor zénz bilen uchriship, Uyghur mejburiy emgikini muzakire qilghanliqi qeyt qilinmaqta.

Adriyan zénzning bildürüshiche, xelq'ara emgek teshkilati yétekchi qollanmisigha dölet hamiyliqidiki mejburiy emgekke da'ir keng mezmunlarni qoshup, “Tutqun sirtida yürgüzülgen dölet hamiyliqidiki mejburiy emgek” uqumini qobul qilish arqiliq, Uyghur mejburiy emgikini bayqash mumkinchilikini kücheytken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.