Хитайниң җяңсу өлкисидә бир химийә завути партлап кетип аз дегәндә 62 адәм өлгән

21‏-Март күни хитайниң җяңсу өлкиси йәнчиң шәһиридә бир химийә завути партлап кетип, 62 адәм өлгән, 600 адәм яриланған.

“ню-йорк вақти гезити” ниң хәвәр қилишичә, 22‏-март күни сақчилар мәзкур завутниң бәзи хадимлирини тутқун қилған. Хитай йәр тәврәшниң көзитиш идариси партлашниң 2.2 Бал тәврәш пәйда қилғанлиқини билдүргән.

“ню-йорк вақти гезити” ниң хәвиридә тәкитлинишичә, партлашта зәһәрлик маддиларниң һава вә суға арилишип кәткән болуши мумкинлики әндишә яратқан икән. Вәқәдә 90 дәк адәмниң яриланғанлиқи, яридарларниң ичидә завутниң баш директориниң барлиқи илгири сүрүлмәктә.

“ню-йорк вақти гезити” ниң қәйт қилишичә, йәнчиң һөкүмәт даирилири 22‏-март күни бәзи ширкәт хадимлириниң тутқун қилинғанлиқини билдүргән, лекин тутқунларниң санини елан қилмиған. Нөвәттә партлашқа неминиң сәвәб болғанлиқи мәлум әмәс. Бир ишчиниң хитайдики “малийә хәвәрлири” гезитигә тәкитлишичә, партлашни тәбиий газ тошуйдиған бир май бак аптомобилиға от кетип, отниң әтрапидики бензин амбарлириға тутушуп кетиши кәлтүрүп чиқарған болуши мумкин икән.

Мәзкур завут асаслиқи һашарат дориси ишләпчиқиридиған кархана болуп, 2007‏-йили қурулған икән. Хитай таратқулириниң илгири сүрүшичә, хитайниң ишләпчиқириш бихәтәрликини сақлаш тармақлири өткән йили мәзкур завутта елип барған тәкшүрүшидә 13 хил бихәтәрлик мәсилиси бар, дәп бекиткән икән. Мәзкур партлаш хитайда йеқинқи 4 йилдин бери йүз бәргән әң қаттиқ партлаш вәқәлириниң бири икән. Хитайда 2015‏-йили тйәнҗиндики бир искилатта йүз бәргән партлашта 173 адәм өлгән иди.