Ma shingrüy: “Shinjangda ‛islam dinini xitaychilashturush‚ muqerrer yüzlinish”

Uyghur aptonom rayonluq partkomning sékrétari ma shingrüy béyjingda échiliwatqan “Ikki yighin” mezgilide muxbirlarning so'allirigha jawab bergen. U sözide nöwette Uyghur rayonida yolgha qoyuluwatqan “Islam dinini xitaychilashturush” siyasitining muqerrer yüzlinish ikenlikini, buning izchil dawam qilidighanliqini bildürgen.

U, 7-mart küni ötküzülgen axbarat yighinida mundaq dégen: “Shinjangda islam dinini xitaychilashturushning zörürlüki hemmeylen'ge ayan. Bu qéchip qutulghili bolmaydighan muqerrer yüzlinish”.

Ma shingrüy yene chet ellerdiki mutexessisler “Assimilyatsiye siyasiti” dep atawatqan xitayning rayondiki “Milletler ittipaqliqi” we “Milletlerning yughurulushi” ni tézlitidighan siyaset hem tedbirlerningmu dawamliq yolgha qoyulidighanliqini ilgiri sürgen.

Xitay taratquliri tarqatqan xewirige qarighanda, axbarat élan qilish yighinida “Uyghur rayonida medeniyet qirghinchiliqining mewjut bolghan yaki bolmighanliqi” heqqide so'al soralghan. Xitay da'iriliri bu so'algha “Shinjang muqam ansambili”din wekil bolup kelgen dilshat perhat isimlik bir Uyghurning éghizi arqiliq jawab qayturghan. Dilshat perhat, “Shinjangdiki her qaysi milletler medeniyitining ‛jungxu'a medeniyiti‚ baghchisida jush urup rawajlan'ghanliqi, zor tereqqiyat we güllinish dewrini kütüwalghanliqi” toghriliq lap urghan.

Halbuki, birleshken döletler teshkilatining kishilik hoquq aliy komissari ishxanisi rayondiki weziyet heqqide élan qilghan doklatida, xitay hökümitining Uyghur rayondiki yuqiri bésimliq siyasetlirining “Insaniyetke qarshi jinayet shekillendürgen bolushi mumkinliki” ni bildürgen idi.