Maliye ministiri amérikining alyumin shirkitini xitaygha sétishni tosup qélishqa chaqirildi

Muxbirimiz jüme
2017-06-10
Share

Bir qisim amérika dölet mejlisi ezaliri amérika maliye ministirigha mektup yollap, uni amérikining alyumin mehsulatliri shirkitini xitaygha sétishni tosup qélishqa chaqirdi.

Roytérsning xewer qilishiche, xitayning jungwang alyumin hessidarliq shirkiti amérikining alyumin mehsulatliri shirkiti-aléris guruhini 2 milyard 330 milyon dollargha sétiwalmaqchi bolghan. Bu xewer otturigha chiqqandin kéyin, 9-iyun 27 neper amérika dölet mejlisi ezasi amérika maliye ministiri stéwin mnuchin ependimge mektup yollap, öz endishilirini ipadiligen we buning bir "Istratégiyilik xata qedem" bolidighanliqini agahlandurghan. 

Xewerde neqil élishiche, mektupta mundaq körsitilgen: "Chet'el meblegh sélish programmiliri ilghar we sezgür herbiy téxnikilarni xitaygha ötküzüp bérishke bérip taqalghanda, amérika chet'el meblighi komitétining bundaq türlerge intayin éhtiyatchan mu'amile qilmiqi bek muhim."

Xewerde körsitishiche, dölet mejlisi ezaliri mektupida aléris guruhining amérika dölet mudapi'esige alaqidar bir qisim qétishma métallarni sinaq qilish we ishlepchiqirish bilen shughullan'ghanliqi, mezkur shirketning tetqiqati hemde téxnologiyisi amérika iqtisadi shundaqla dölet xewpsizliki üchün bekmu halqiliq ikenlikini bildürüshken. Ular mektupida yene, jungwang shirkitige oxshash chong tipiki shirketlerning da'im xitay herbiy sahesi bilen yéqin munasiwet saqlaydighanliqi, buning amérikigha tehdit shekillendüridighanliqini otturigha qoyghan. 

Xewer qilinishiche, jungwang xitaydiki eng ching alyumin sodigiri lyu jongtyenning qollishigha érishken bolup, ularning amérika alyumin mehsulatliri shirkitini sétiwélish sodisi ötken yili awghustta élan qilin'ghan iken. 

Ötken yili noyabirda nechche on amérika dölet mejlisi ezasi eyni chaghdiki maliye ministiri jek léwge mektup yollap, uni bu sodini bikar qilishqa chaqirghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet