Уйғурлар диярида хитай кимлики еңини турғузуш тәшвиқати давам қилмақта

Мухбиримиз әзиз
2017.08.29

Уйғурлар дияридики сиясий бесимларниң бир ипадиси һәр дәриҗилик уйғур таянч кадирлар тохтавсиз рәвиштә елан қиливатқан очуқ хәтләрдә өз әксини тапиду.

Ақсуниң валиси мәрдан муқийтниң бүгүнки очуқ хетидә болса, техиму илгирилигән һалда “пан түркизм” вә “пан исламизм”ни түгитиш чақириқи оттуриға қоюлуп, хитай кимлики еңини турғузуш тәвсийә қилинған.

“шинҗаң гезити” ниң 29-авғуст санида елан қилинған мәрданниң очуқ хетидә “үч хил күч” ләрниң “пан түркизм” вә “пан исламизм” идийәлиридин пайдилинип, тарихни бурмилиғанлиқи, “вәтинимиз шәрқий түркистан, динимиз ислам” дегән шоарни тәшвиқ қилип “шинҗаңни мустәқил қилмақчи болғанлиқи” алаһидә баян қилинған. Шуниң билән биргә, бу идийәниң һазирқи яшларни хата йолға башлаватқанлиқи алаһидә тәкитләнгән. У бу һәқтә “‛пан түркизм‚ вә ‛пан исламизм‚ идийәлири арқилиқ уйғур қериндашлиримиздики ‛җуңхуа миллити ортақ гәвдиси‚ чүшәнчисини суслаштурмақчи болған” дегән.

Мәрданниң очуқ хети уйғурларға хитаб қилиш билән ахирлашқан болуп, у “тамчә суниң пәқәт окяндила мәвҗут болуп туралайдиғанлиқи”ни, уйғурлар пәқәт “җуңхуа ортақ гәвдиси”ниң бир парчиси болғандила өз мәвҗутлуқини сақлап қалалайдиғанлиқи”ни тәкитлигән.

Муһаҗирәттики уйғур зиялийлар буни “җуңхуа кимликини тәшәббус қилиш әмәлийәттә хитайниң уйғурларни ассимилятсийә қилип түгитиш сияситигә яндин мәдәт бәргәнлик” дәп әйиблиди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.