Хитай һөкүмити еғир кишилик һоқуқ җинайәтлирини тохтитиш тәклиплирини тамамән рәт қилған

Кишилик һоқуқ тәшкилатлири 2024-йил 25-июн күни елан қилған бирләшмә баянатта дейилишичә, хитай һөкүмити күнсери еғирлишиватқан кишилик һоқуқ киризисини ахирлаштуруш һәққидики тәклипләрни рәт қилған болуп, бирләшкән дөләтләр тәшкилатиниң кишилик һоқуқ әһвалини қәрәллик тәкшүрүш нопузини көзгә илмиған.

Кишилик һоқуқ тәшкилатлиридин бири болған “қоғдиғучи” тәшкилатиниң 24-июн елан қилған хәвиридә ейтилишичә, 6-айниң 11-күни, бирләшкән дөләтләр тәшкилати 2024-йили 1-айда елип барған кишилик һоқуқ әһвалиға қәрәллик қарап чиқиш тәклипини қобул қилиш яки рәт қилиш һәққидә омумий уқтуруш елан қилған; бу тәклип б д т ға әза дөләтләрдики кишилик һоқуқ әһвали хатирисини тәкшүрүш пирограммиси икән. Кишилик һоқуқ җинайәтлирини йошуруш яки уни рәт қилишқа уста хитай һөкүмити 428 түрлүк тәклипниң 290 түрини қобул қилидиғанлиқини, 32 түригә диққәт қилидиғанлиқини, әмма 98 түрини рәт қилидиғанлиқини билдүргән. Хитай рәт қилған түрләр ичидә инсанийәткә қарши җинайәт, еғир қийнаш, из-дерәксиз йоқитиветиш, кишилик һоқуқ қоғдиғучилириға, мухбирларға зиянкәшлик қилиш мәсилилирини һәл қилиш қатарлиқ тәклипләр бар икән.

Хитай һөкүмити 2024-йил 1-айдики тәкшүрүшкә тәйярлиқ қилиш давамида, 2009-йил, 2013-йил вә 2018-йилида қилғиниға охшаш, пүтүнләй сахта учурларни бәргән һәмдә һечқандақ аммиви җәмийәт яки тәшкилатниң бу тоғрулуқ мәлумат топлап, дөләтләрниң доклат һазирлишиға яки тәкшүрүшигә ярдәм қилишиға тосқунлуқ қилған. Хитайниң бу қетим қорқунчлуқ кишилик һоқуқ җинайәтлирини тохтитиш тәклиплирини рәт қилиш нисбити 30 пирсәнткә йәткән болуп, 2018-йилдикидинму 18 пирсәнт юқири болған.