Хитай һөкүмити таҗсиман вируси түпәйлидин өлүшниң өлчимини елан қилди

Хитай һөкүмити башқурушидики “хитай хәвәр тори” ниң 20-декабирдики хәвиридә ейтилишичә, бейҗиң университети қармиқидики биринчи дохтурханиниң мәсуллиридин ваң гуйчяң шу күни мухбирларни күтүвелиш йиғинида сөз қилип таҗсиман вируси билән юқумлинип өлүштики өлчәмләр һәққидә мәлумат бәргән.

Хәвәрдә ейтилишичә, ваң гуйчяң “клиникилиқ нуқтидин алғанда нөвәттики омкрон бактерийәсидин зәһәрләнгәндин кейин йүз беридиған өлүмниң асаслиқ сәвәби түпки кесәлликләрдур. Вирустин зәһәрлиниш түпәйлидин нәпәс сиқилип өлүп кетидиғанлар бәкму аз” дегән. Ваң гуйчяңниң тонуштурушичә, дөләтлик сәһийә тармақлири йеқинда мутәхәссисләрни ишқа селиш арқилиқ бу һәқтики өлчәмләр тоғрисида уқтуруш тәйярлиған. Буниңда таҗсиман вируси билән юқумлиништин келип чиққан өпкә яллуғи вә нәпәс йоли қисилиш һадисиси өлүмгә сәвәб болған болса буни таҗсиман вируси билән юқумлинип өлгән, дәп һөкүм чиқириш, әмма вирус билән юқумланғандин кейин бимар башқа кесәлликләр вә әсли кесәлликләр түпәйлидин өлүп кәтсә буни таҗсиман вирусидин келип чиққан өлүм әмәс, дәп бекитиш бәлгиләнгән.

Бу йеңи өлчәм бойичә болғанда хитайда ямрашқа башлиған таҗсиман вирусида өлгән кишиләрниң көп қисми “башқа кесәлликләр түпәйлидин өлүп кәткән” дәп айрилидиған болуп, буниң кәлгүсидики вирус юқумида өлгән кишиләр санини аз көрситиш урунуши икәнлики тәхмин қилинмақта. Әмма бу хитай һөкүмитиниң тунҗи қетим вирус юқумида адәмләрниң өлүшини етирап қилғанлиқи болуп, уларниң илгирики вақитларда тәкрарлап келиватқан баянлиридин зор дәриҗидә пәрқ қилиду. Йәнә келип хитайда аз дегәндиму бир милйон кишиниң таҗсиман вируси түпәйлидин өлүши тәхмин қилиниватқанда бу хил йеңи өлчәмниң елан қилиниши һәр саһә кишилириниң зор диққитини қозғимақта.