Xitay bilen pakistan Uyghur éli we gilgit-baltistan rayonida qoralliq qisimlar manéwiri élip bérishqa kélishken

Xitay merkizi siyasiy qanun komitétining sékrétari chén minggo bilen pakistan ichki ishlar ministiri mohsin neqwi 22-séntebir küni pakistan paytexti islam'abadta körüshüp, ikki dölet saqchi we qoralliq saqchi qisimlirining Uyghur ili we pakistanning gilgit-baltistan rayonida birleshme manéwir élip bérishigha kélishken.

Xewerde, ikki terep saqchi we qoralliq qisimlirining birleshme manéwirining qachan we Uyghur élining qaysi jaylirida élip bérilidighanliqi tilgha élinmighan bolsimu, emma pakistanning “Irqiy qirghinchiliq rayoni” dep qariliwatqan Uyghur élide xitay bilen qoralliq saqchi qisimlirining “Térrorluqqa qarshi” birleshme manéwir élip bérishni qarar qilishi diqqet qozghimaqta.

Pakistan radiyosining 22-séntebir bergen bu heqtiki xewiride, chén minggo bilen mohsin neqwining ikki terep arisida nurghun sahelerdiki hemkarliqini, jümlidin térrorluq, etkeschilik we zeherlik chékimlikke qarshi turush qatarliq jehetlerdiki hemkarliqni kücheytishke kélishkenliki qeyt qilinmaqta.

Yéqinqi yillarda, béyjing bilen islam'abadning qeshqer-giwadar porti arisidiki “Xitay-pakistan iqtisadi karidori” ning déngizgha chiqish éghizi bolghan balujistan rayonidiki esliheliri “Balujistan azadliq armiyesi” ning qoralliq hujum nishani bolup kelgen idi. “El-jezire” ning xewer qilishiche, bu yil 8-ayda yüz bergen balujistandiki toqunush we hujumlarda 70 tin artuq kishi ölgen.

Xitay-pakistan arisidiki “Térrorluqqa qarshi” bu hemkarliq, balujistan teshkilatlirining téxi ötken hepte jenwede ötküzgen yighinigha dunya Uyghur qurultiyi teklip qilin'ghan we dunya Uyghur qurultiyining en'gliyede turushluq wekili rehime mehmut yighin'gha qatniship, Uyghurlarning weziyitidin doklat bérishining arqisidinla élan qilin'ghan. Bu ikki ishning öz ara baghlinishliq ikenlikige da'ir héchqandaq bir delil bolmisimu, emma xitayning Uyghurlarni basturushini dölet xewpsizliki jehettinla emes, belki diplomatiye jehettinmu b d t da qollap kéliwatqanliqi melum.