Amérika merkiziy istixbarat idarisi xitay bilen riqabetlisheleydighan yéngi tor qorali yasap chiqti

“Blumbérg xewerliri” ning 26-séntebirdiki xewiride éytilishiche, amérika merkiziy istixbarat idarisi (CIA) yéqinda xaraktér jehette ChatGPT gha oxshap kétidighan sün'iy eqil sistémisini ishlep chiqqan bolup, amérika hökümitige qarashliq 18 istixbarat orginining hemmiside ishlitilishke tapshurulghan.

Mezkur sün'iy eqil sistémisi taghdek döwilinip kétidighan ochuq uchur menbeliridin istixbarat organliri tekshürüwatqan délolar we mesililerge chétishliq uchurlarni eng téz sür'ette toplap süzüp chiqalaydiken. Xewerde éytilishiche, buning téz sür'ette yasap chiqilishigha xitayning dunya miqyasida téxnologiye sahesige hökümranliq qiliwélishqa urunuwatqanliqi seweb bolghan. Merkiziy istixbarat idarisi sün'iy eqil bölümining diréktori randiy nikson (Randy Nixon) bu heqte söz qilip “Biz gézit we radiyodin gézit we téléwizorgha, andin qaytidin gézit we torgha chiqimiz. Bu jeryanda toplighan uchurlarni analiz qilip chiqish biz üchün déngizdin yingne izdeshke oxshap qalghan idi. Bu qoral bizning bu jehettiki yükimizni zor derijide yéniklitidu” dégen.

Xewerde éytilishiche, xitay hazir eng zor küch serp qiliwatqan nuqta sün'iy eqil sahesi bolup, 2030-yiligha barghanda bu sahede dunyawiy yétekchige aylinish nishanini ashkara otturigha qoyup bolghan. Xitay hökümiti 2021-yili yasap chiqqan “Teptish” namliq sün'iy eqil sistémisi özige tapshurulghan jinayi desturlarni tehqiqlesh we ulargha höküm élan qilishta 97 pirsentlik toghriliqqa yetken. Emma amérika qanun sahesi hazirmu buningda yenila adem küchi arqiliq ish béjirishni dawam qilip kelgen. Mezkur yéngi tor qorali amérika istixbarat xadimlirini eng téz sür'ette lazimliq uchurlarni eng toghra tépip chiqish, shundaqla paydiliq uchurlarni we yoshurun xewplerni bayqash imkaniyitige ige qilidiken.