Xitay hökümiti “Shinjang yaxshi jay” teshwiqatini kéngeytmekte

Xitay hökümiti bashqurushidiki “Tengritagh” torining 13-iyundiki xewiride éytilishiche, xitay hökümiti shu küni qeshqer shehiride “2023-Yilliq sayahetchilikni tereqqiy qildurush chong yighini” we “‛shinjang yaxshi jay‚ sayahetchilikini tonushturush yighini” chaqirghan.

Xewerde éytilishiche, yighin künliride Uyghur diyaridiki sayahetchilikni rawajlandurush heqqide ichkiri xitaydiki shirketler bilen bir qatar kélishimler imzalan'ghan. Bu qétimqi yighin'gha xitay medeniyet we sayahet ministirliqining ishtirak qilishi buning merkiziy hökümetning bir qolluq orunlashturushi ikenlikini körsitip bergen.

Bu sayahetchilik teshwiqati xitay hökümiti yéqinda otturigha qoyghan “Qeshqerni herqaysi milletler yughurulup ketken köp milletlik inaq makan'gha aylandurush” sho'ari bilen tengla otturigha chiqqan bolup, xitayning awwal bu sheherni özgertish, andin sayahetchilerni jelp qilish gherizini ipadiligen.

Xitay hökümiti yillardin buyan Uyghur diyaridiki herqaysi jaylarni “Sayahet nuqtisi” sheklide teshwiq qilip kelgen bolup, emdilikte qeshqerni “Shinjang yaxshi jay” teshwiqatidiki merkiziy nuqtigha aylandurushi ularning “Bingtu'en bilen yerlikni birleshtürüsh”, “Jenubiy shinjangning nopusini elalashturush” qatarliq istratégiyelik sho'arliri bilen mas qedemde otturigha chiqiwatqanliqi melum.

Xitay hökümitining bu xildiki “Sayahet qiltiqi” heqqide toxtalghan siyasiy analizchi éwa shyaw özining bu heqte “Tashqi siyaset” zhurnilining 24-may sanida élan qilghan obzorida, xitay hökümitining Uyghur diyaridiki qirghinchiliqni hélihem dawamlashturuwatqanliqini, emma xelq'arani aldash üchün bu jayni “Sayahetchilik bazisi” sheklide teswirlep, lagér we basturush jinayetlirini yoshurushqa urunuwatqanliqini körsitip ötkenidi.