Хитай һөкүмити уйғур анилар вә өсмүрләрни қирғинчилиққа қарши тәшвиқатларға ишләтмәктә

Мухбиримиз әзиз
2021.11.23

Хитай һөкүмитиниң уйғур дияридики қирғинчилиқ қилмиши йеқинқи мәзгилләрдә хәлқараниң күчлүк тәнқидигә вә әйиблишигә дуч кәлгән иди. Әнә шу хил әһвалға тақабил туруш үчүн хитай һөкүмити йеқинда уйғур анилар вә өсмүрләрни тәшкилләп “қирғинчилиқ сәпсәтисигә қарши мухбирларни күтүвелиш йиғини” чақирған.

“хитай хәвәрлири” ториниң бу һәқтики хәвиридә ейтилишичә, хитай даирилири керийә, йәркән, ақчи, текәс вә үрүмчидики бир қисим уйғур аниларни екранға чиқирип уларниң ағзидин нөвәттики бәхтияр турмуш вә хатирҗәм һаят һәққидә мәдһийә оқутқан. Арқидинла йиғин мәйданидики мухбирларға ашу уйғур өсмүрлири вә аниларниң бу һәқтики алдин видийоға елинған сөзлирини қоюп берип “ғәрп дунясидики бир қисим дүшмән күчләр шинҗаңда ирқий қирғинчилиқ болуватиду, дәп бизгә төһмәт қиливатиду. Әмилийәттә һәр милләт хәлқи һазир әң бәхтияр һаләттә яшаватиду” дегән.

Һалбуки син көрүнүшлиридики анилар вә балиларниң көпинчиси хитайчә сөзлигән болуп, уйғур дияридики уйғур тилиниң мәни қилинишиға даир учурларни вастилик һалда әкс әттүргән. Әмма өткән бир нәччә айда ғәрб дунясида арқиму-арқидин елан қилинған уйғурлар һәққидики доклатларда уйғурларниң лагерларға қамалғанлири яки лагер сиртидикилириниң әмәлийәттә анчә пәрқ қилмайдиған муһитта икәнлики ейтилип “пүткүл район нөвәттә үсти очуқ түрмигә айландурулған” дәп көрситилгәниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.