Хитай ташқи ишлар министири америка, японийә вә австралийәниң бирләшмә баянатини әйиблиди

Мухбиримиз җүмә
2016-07-27
Share

Америка, японийә вә австралийә даирилири җәнубий деңиз мәсилидә бирләшмә баянат елан қилип дөләтләрни җәнубий деңизниң хәлқара очуқ деңизлиқ орнини капаләткә игә қилишқа чақирғандин кейин, хитай мәзкур баянатқа етираз билдүрди.

Хитай ташқи ишлар министири ваң йи чаршәнбә күнидики баянатида юқиридики әлләр ташқи ишлар министирлири тәрипидин елан қилған бирләшмә баянатини "отниң үстигә яғ чачқанлиқ" дәп әйиблиди.

У мундақ деди: "бу үч тәрәп баянати от үстигә яғ чачқанлиқ. Һазир силәрниң тинчлиқ сақлиғучи яки чатақ териғучи икәнликиңларни испатлайдиған пәйт."

25-Июл америка ташқи ишлар министири җон кәрий, австралийә ташқи ишлар министири җуля бишоп вә японийә ташқи ишлар вәзири фумйо кишида қатарлиқлар лаосниң пайтәхти вйентянда бирләшмә баянат елан қилип, асия тинч окян райони вә һинди окяндики деңиз қаидә-принсиплирида чиң турушниң муһимлиқини тәкитлигән.
Улар йәнә бу деңизға тутишидиған дөләтләрни деңизда дәхлисиз йүрүш әркинлики вә деңиз үстидин тосалғусиз учуп өтүш әркинликини һөрмәт қилишқа чақирған иди.

Мәзкур баянат лаоста шәрқий җәнуби асия әллири иттипақиниң ташқи ишлар министирлири йиғини ечилған мәзгилдә елан қилинған.

Униңдин башқа бу баянат йәнә, хитай җәнубий деңизниң парасел вә спрател араллири тәвәсидә бир қисим сүний аралларни ясап һәрбий қоралларни орунлаштурған вә хәлқара сот хитайниң земин игиләш һәрикитини қанунсиз, дәп елан қилған мәзгилигә тоғра кәлди.

12-Июл баш оргини голландийәниң дәнһаг шәһиригә җайлашқан хәлқара сот филиппин хитайниң җәнубий деңиздики земин игиләш һәрикити үстидин сунған әрзгә қарап чиқип, хитайниң мәзкур деңизда тарихий һәққи йоқ, дәп һөкүм елан қилған иди.

10 Дөләт әза мәзкур тәшкилатниң ташқи ишлар министирлири хәлқара сотниң юқиридики һөкүмидин кейин тунҗи қетим учришип район бихәтәрлики мәсилисини үстидә өзләшкән.

Һалбуки, йиғиндики пикир ихтилапи түпәйли, йиғин әһли җәнубий деңиз мәсилидә ортақ пикригә келәлмигән вә бу мәсилә бивастә тилға елинған бир бирләшмә баянат елан қилалмиған.

Мәлум болушичә, америка, австралийә вә японийәниң җәнубий деңиз һәққидики бирләшмә баянати юқириқи бошлуқни толдурған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт