Amérika metbu'atlirida amérikaning xitaygha dawamliq yardem qilmasliqi tekitlenmekte

Amérikada xitayning barghanséri mustebitlishiwatqan hakimiyiti heqqidiki tonushning artishigha egiship, amérikani xitay bilen ilgirikidek munasiwet ornitishni ayaqlashturush heqqidiki chaqiriqlarmu kücheymekte.

Amérikadiki nopuzluq zhornallardin “Wal-sitrit zhornili” gézitide élan qilin'ghan “Amérika emdi xitaygha yardem qilmasliqi kérek” mawzuluq köz qarash maqalisida del shundaq idiye algha sürülgen. Maqalida mundaq déyilgen:

“Köp yillardin buyan, amérika xitaygha alahide mu'amile qilip, uning dunya soda teshkilatigha eza bolushigha yardem qildi we bu arqiliq xitayning öz tijaritini zor derijide kéngeytishige yardem berdi. Biz xitay armiyesini terbiyeleshke yardem berduq, ikki ewlad inzhénér we alimlirini terbiyelep berduq. Xitayning hazir bizning düshminimizge aylan'ghanliqini nezerde tutqanda, ilgiriki siyasetlerning tolimu exmeqliq ikenlikini körimiz. Mundaqche éytqanda, biz bizni yémekchi bolghan éyiqni öz qolimiz bilen baqtuq.”

Maqalide xitayning kéngiyiwatqan tashqiy siyasiti, zamaniwi armiyesi bilen amérika üchün jiddiy bir tehditke aylan'ghanliqi, 2022-yili amérikaning küch tengpungluqini özige paydiliq terepke burushi kérekliki, xitayning hazirqi chékiniwatqan iqtisadining buning üchün bir paydiliq amil bolushi mumkinliki bayan qilin'ghan.

“Wal-sitrit zhornili” gézitide élan qilin'ghan “Xitay iqtisadining asta érishi” namliq yene bir maqalide chüshendürülüshiche, xitayning iqtisadi hazir asta xaraktirliq iqtisadiy krizisni bashtin kechürüwatqan bolup, bu hazirqi hakimiyetning muqimliqigha we dunya iqtisadigha éghir selbiy aqiwetlerni élip kélishi mumkin iken.

Maqale aptori tomas dustérbérgning körsitishiche, nurghun agahlandurush alametlirige qarimay, gherb analizchiliri we tedbir belgiligüchiler shi jinpingni bu krizisni kontrol qilalaydu, dep qarap, ümidwar pozitsiyede bolmaqtiken. Biraq aptor bu ümidwarliqni “Xata” dep bahalighan we “Amérika we uning ittipaqdash döletliri orunsiz ümidwarliqqa bérilmey, eksiche xitay iqtisadidiki chöküsh élip kélidighan aqiwetni toghra mölcherlishi, uning öz iqtisadigha élip kélidighan selbiy tesirini azaytishqa heriket qilishi kérek,” dégen.