Xitay da'iriliri xotendin tughut yéshidiki 1000 neper Uyghur qizni xitay ölkilirige yötkigen

Muxbirimiz erkin
2019-02-18
Élxet
Pikir
Share
Print

Xitay da'iriliri 17‏-‏féwral küni "Yéza éshincha emgek küchlirini ishqa orunlashturush" namida xotendin yene 1000 neperdek Uyghur qizni xitayning ichkiri ölkilirige yötkigen.

Xitaydiki "Shinxu'a tori" ning xewer qilishiche, 17‏-féwral küni xotenning herqaysi nahiyeliridin kelgen 1005 neper "Éshincha emgek küchi" poyizgha olturup xitayning ichkiri ölkilirige qarap yolgha chiqqan. Xewerde ularning yash-qurami we jinsi tilgha élinmighan bolsimu, emma xewerge qoshup bérilgen resimdin ularning hemmisining tughut yéshidiki qizlar ikenlikini körüwélishqa bolidu.

Bezi Uyghur pa'aliyetchilerning ilgiri sürüshiche, xitay hökümiti "Yötkep ishqa orunlashturush" ni Uyghurlarni tarqaqlashturushtin sirt yene ularning tebi'iy köpiyishini kontrol qilishtiki bir wasite süpitide qollanmaqta iken. Lékin xitay hökümiti Uyghur "Éshincha emgek küchliri" ni yötkep ishlitishni muqimliqni ishqa ashurush, namratliqtin qutquzushtiki istratégiyelik orunlashturush, dep körsetmekte.

"Shinxu'a tori" ning xewiride ashkarilishiche, da'iriler 17‏-féwral daghdughiliq murasim ötküzüp, yuqiriqi qizlarni xitayning jyangshi, shendung, xubéy, fujyen ölkilirige yolgha salghan. Murasimda xoten wilayetlik adem küchi we ijtima'iy parawanliq idarisining emeldari söz qilip, "Téximu köp kishini ichkiridiki ölke, sheherlerde ishleshke righbetlendüridighanliqi, ularning u jaylarda qélishi we qétilip kétishige yardem béridighanliqi" ni bildürgen.

Yerlik da'irilerning "Shinxu'a tori" gha bildürüshiche, xoten wilayitining pilani bu yil ichide yötkep ishqa orunlashturushni 600 ming adem qétimgha yetküzüsh, 2‏-ayning axirigha qeder wilayet boyiche 5 ming "Yéza éshincha emgek küchi" ni ichkiri ölkilerge yötkeshni ishqa ashurush iken.

Toluq bet