Тәңритағ тори хотәндики вәқәләрдә 3 йил ичидә 23 сақчи өлүп, 64 сақчи яриланғанлиқини ашкарилиди

Мухбиримиз шөһрәт һошур
2017-04-05
Share

Уйғур районлуқ һөкүмәтниң ахбарат оргини болған тәңритағ тори бүгүнки хәвиридә, хотәндә йеқинқи үч йил ичидә чиққан вәқәләрдә җ х саһәсиниң өзидинла 23 нәпәр сақчи өлгәнлики вә 64 сақчиниң яриланғанлиқини ашкарилиди.

Бу учур бүгүн хотән шәһириниң гуҗанбағ йезисида өткүзүлгән аталмиш террорға қарши күрәштә қурбан болғанларни хатириләш мурасими өткүзүлгәнлики һәққидики хәвәрдә тилға елинди. Хәвәрдә йәнә, хотәндә нөвәттә 160 инқилабий қурбанниң йәрлики барлиқи, йеқинда хотәндә мәхсус инқилабий қурбанлар қәбристанлиқини тәсис қилидиғанлиқи тилға елинған. Әмма, бу 160 қурбанниң кимлики, қачан, қәйәрдә өлгәнлики баян қилинмиған. Хәвәрдә дейилишичә, бүгүнки бу аталмиш инқилабий қурбанларни хатириләш мурасими гуҗанбағ йезисиниң рок кәнтидә өткүзүлгән.

Мурасимға хитай қораллиқ қисимлири вә вилайәт тәвәсидики әмәлдарлар, ишчи-хизмәтчиләр вә аммидин болуп миңларчә киши қатнаштурулған. Мурасимда, аталмиш инқилабий қурбанлардин илгири нами ашкариланған ғәйрәт мамуттин башқа, мутәллип өмәр, фең чеңшең, батур турсун, мәмәт әмәр вә фән йүнюң қатарлиқ намәлум исимлар тилға елинған. Хәвәрдә мурасиминиң немә үчүн гуҗанбағниң рок кәнтидә өткүзүлгәнлики, йәни бу кәнтниң өлгүчиләрдин бирәри билән алақиси бар-йоқлуқи әскәртилмигән.

Хитай даирилири йиллардин бери, аталмиш террорлуққа қарши һәрикәтлиридә өлгән сақчи хадимлириниң исимликини ахбараттин йошурун тутуп кәлмәктә, буларниң бир қисми пәқәт мана мушундақ матәм яки мукапатлаш мурасимлиридила ашкарилинип қалмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт