2000-Yillarda tughulghan xitay yashliri ili teweside qedimiy yadikarliq izdeshke seperwer qilin'ghan

Xitayning shinxu'a tori tarqatqan bir xewerdin qarighanda, xitay da'iriliri mexsus 2000-yilliri tughulghan xitay yashliri we aliy mektep oqughuchilirini Uyghur élide “Medeniyet yadikarliqliri” izdeshke seperwerlik qilghan.

Shinxu'a torining xewiride bayan qilinishiche, bu bir türküm alahide “Sayahetchiler” ili oblastining nilqa nahiyesidiki 4-nöwetlik “Memliketlik medeniyet yadikarliqlirini tizimlash xizmet guruppisi” ning ezaliri bolup, ular her küni tang seherde nilqidiki medeniyet yadikarliqliri orunlirigha baridiken we beziliri chöl-jezirilerde, beziliri qiyaliqlarda, beziliri étizliqlar astigha kömülgen yadikarliqlarni izdeydiken. Süretlik xewerge qarighanda, arxé'ologiyelik qidirish wezipisi téngilghan bu yashlarning hemmisi dégüdek xitaylar ikenliki melum.

Xitay hökümiti yéqinqi yillardin buyan Uyghur élide arxé'ologiye arqiliq özlirining siyasiy muddi'asini ilgiri sürüsh herikitini kücheytken idi. Xitay hökümiti ötken yili dékabirda béyjingda mexsus “Chégra rayon arxé'ologiye ilmiy muhakime yighini” échip, chégra rayonlarning tarixi we medeniyitining xitay medeniyitining muhim terkibiy qismi ikenliki tekitligen. Shuning bilen birge, arxé'ologiyeni qandaq qilghanda siyasetke maslashturup, xitay hökümiti teshebbus qiliwatqan tarix we medeniyet éngi berpa qilghili bolidighanliqi heqqide alahide körsetme bergen idi.

Shinxu'a torining yuqiriqi xewirige qarighanda, nilqa nahiyeside medeniyet yadikarliqliri izdeydighan bu yashlar “Ilgiri bayqalmighan yadikarliqlarni qidirip tizimlaydiken we tarixiy guwahchilarni qandaq qoghdashni öginidiken.”