Yawropa parlaméntidiki “Yawropa – xitay dostluq guruppisi” toxtitip qoyulghan

Yawropa parlaméntidiki “Yawropa – xitay dostluq guruppisi” toxtitip qoyulghan. “Politko” gézitining xewer qilishiche, mezkur dostluq guruppisining xitay hökümitining tashqi ishlar apparatlirigha bek yéqinliqi parlamént ezaliri arisida endishe qozghighan iken.

Bu heqtiki endishiler ötken yili 11-aydin tartip köp qétim tilgha élin'ghan we politko qatarliq metbu'atlarda xewer qilin'ghan iken.

25-Yanwar küni yawropa parlaméntining chet'el hökümetlirining tesiri körsitish heriketlirini közitidighan alahide komitétida bu mesile heqqide ispat anglash yighini ötküzülgen. Bu yighinda mezkur guruppa pa'aliyetlirining 12-aydin bashlap resmiy toxtitilghanliqi bildürülgen.

Parlamént ezaliri yighinda mezkur dostluq guruppisining bashliqi, chéx parlamént ezasi zahradilning aldinqi ayda maqullan'ghan yawropa-xitay meblegh sélish uniwérsal kélishimi heqqidiki jiddiy söhbetlerge qatnashqan soda hey'itining mu'awin re'isi bolushtek muhim orun'gha ige bolushining diqqet qozghaydighanliqini bildürgen. Uningdin sirt yene, mezkur guruppining bash katipi gey lin, xitay puqrasi we shundaqla zehradilning yardemchisi bolup, u ötken on yérim yil boyiche yawropa ittipaqi parlamént ezalirini on nechche qétim xitaygha sayahetke teshkilleshke mes'ul bolghan bolup, bu sayahetler béyjingning yumshaq küch apparatlirigha chétilidiken.

Chéx parlamént ezasi zehradil yighinda mezkur guruppa pa'aliyetlirining 12-aydin bashlap resmiy toxtitilghanliqini delilligen. U özining xitay terepni paydiliq soda uchurigha érishish imtiyazigha érishtürgenliki we dostluq guruppisining xitayning teshwiqat qorali süpitide xizmet qilghanliqi heqqidiki qarashlarni ret qilghan. Biraq u mezkur dostluq guruppisi uyushturghan pa'aliyetlerning chiqimini xitay hökümiti üstige alghanliqini ret qilalmighan.

Melum bolushiche, shu künki ispat anglash yighinida chéx aqillar ambiri “Sinopsis instituti” we firansiye aqillar ambiri “Montayin instituti” diki tetqiqatchilar xitay tesiri heqqide söz qilghanda yawropa-xitay dostluq guruppisini xitay dölitining yawropa siyasitige arilishishqa urunushning bir misali dep bahalighan.