3 Sherqiy türkistan teshkilati "Türk dunyasigha aliy xizmet mukapati" gha érishti

Ixtiyariy muxbirimiz erkin tarim
2020-02-03
Share
uch-turk-teshkilati.jpg 3 Sherqiy türkistan teshkilati "Türk dunyasigha aliy xizmet mukapati" gha érishti. 2020-Yili 2-yanwar, türkiye.
RFA/Erkin Tarim

Uzun yillardin buyan türkiyede pa'aliyet élip bériwatqan sherqiy türkistan fondi, sherqiy türkistan yashlar teshkilati we eysa yüsüp alptekin fondi 2019-yilliq "Türk dunyasi aliy xizmet mukapati" gha érishti.

2-Yanwar küni istanbulda "Ülkü ojaqliri" teshkilatining uyushturushi bilen 2019-yilliq "Türk dunyasi aliy xizmet mukapati" ni tarqitish murasimi ötküzüldi.

Mukapat tarqitish murasimigha "Ülkü ojaqliri" teshkilatining re'isi sinan atesh ependi, ezaliri we milletchi heriket partiyesining bir qisim parlamént ezaliri we rehberlirimu qatnashti.

Murasimda "Ülkü ojaqliri" teshkilatining re'isi sinan atesh ependi söz qildi. U sözide "Ülku ojaqliri" teshkilatining zalimlargha qarshi mezlumlarning yénida bolush prinsipliri boyiche bügün öz wetenliride xitay teripidin qurulghan lagérlarda turuwatqan Uyghur we qazaq qatarliq qérindash milletlerning éghir weziyitini anglitishqa alahide ehmiyet bériwatqanliqini, bundin kéyinmu bu xizmetni ching tutup ishleydighanliqini ipadilidi.

Murasimda 20 din artuq sahede türk dunyasi üchün xizmet körsetken shexsler we teshkilatlar mukapatlandi. Murasimida türk dunyasining iptixar mukapati türkiyening sabiq mu'awin bash ministiri, milletchi heriket partiyesining re'isi dewlet baghcheli ependige bérilgenliki élan qilindi. Uningdin bashqa "Saljuqlar tarixi" namliq kitabni yazghan proféssor erqan göksu ependige, "Türkler kéliwatidu" namliq kinoni ishligen shirketke hem türk dunyasining iptixar mukapati bérildi. Osmaniye fondi teshkilatigha türk dunyasining xizmet mukapati bérildi. 2019-Yili "Balilar tongmisun" dégen namda yardem pa'aliyiti élip bérip Uyghur yétim balilargha qishliq kiyim teminligen, köp sandiki Uyghur yétim balilarning xetnisini qildurghan sherqiy türkistan fondi, sherqiy türkistan yashlar teshkilati we eysa yüsüp alptekin fondi qatarliq teshkilatlargha köchmen yétimlerge yardem qilish xizmet mukapati bérildi.

Biz bu murasim toghrisida pikir-qarashlirini élish üchün bu murasimda sehnige chiqip mukapat tapshurup alghan sherqiy türkistan fondining re'isi muhittin janUyghur, eysa yüsüp alptekin fondining re'isi ömer qul ependi we sherqiy türkistan yashliri teshkilatining re'isi ilhan turanli ependiler bilen söhbet élip barduq.

Muhittin janUyghur ependi sherqiy türkistan fondining 2019-yili qishta "Balilar tongmisun" namliq yardem pa'aliyiti uyushturup, köp sandiki Uyghur yétim balilargha kiyim-kéchek élip bergenliki, bu sewebtin mukapatqa layiq körülgenlikini bayan qilip ötti.

Muhittin janUyghur ependi türkiyediki üchinchi chong partiye bolghan milletchi heriket partiyesining "Ülkü ojaqliri" namidiki yashlar teshkilatining bundaq bir mukapat bérishining özliri üchün bir ilham bolghanliqini tekitlidi.

Eysa yüsüp alptekin fondining re'isi doktor ömer qul ependi mundaq dédi: "Sherqiy türkistan fondi, sherqiy türkistan yashlar teshkilati we eysa yüsüp alptekin fondi qatarliq üch teshkilat hemkarlishish ehdinamisi tüzgen iduq. Biz ikki yildin buyan sherqiy türkistanliq yétim balilargha kiyim-kéchek élip bériwatimiz, yene yétim balilarni xetni qildurush pa'aliyitimizmu bar. Ulargha qelem, kitab we depterlirini élip bériwatimiz, ularning a'ililirige un, yagh, gürüch yardem qiliwatimiz. Qilghan bu xizmetlirimiz üchün mukapat berdi, nahayiti xursen bolduq, bundin kéyin téximu köp ishlarni qilimiz."

Sherqiy türkistan yashlar teshkilati mes'uli ilham turanli ependi bundin kéyin qilmaqchi bolghan xizmetliri heqqide toxtilip ötti.

Türk dunyasi aliy xizmet mukapati 6 yildin buyan tarqitiliwatqan bolup, hazirghiche shé'ir déklamatsiye qilip dangq chiqarghan mujahit qeshqerli, Uyghur yash pa'aliyetchi asiye qaraqash xanim, eysa yüsüp alptekin fondining re'isi ömer qul ependi qatarliqlar mezkur mukapatqa érishken idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet