Amstérdam we karlsruxé sheherliridimu “5-Iyul ürümchi qirghinchiliqi” ni xatirilep namayishlar élip bérildi

D u q xadimlirining bergen melumatlirigha asaslan'ghanda, “5-Iyul ürümchi qirghinchiliqi” ning 13 yilliqini xatirilesh munasiwiti bilen dunyaning herqaysi elliridiki 30 din artuq sheherde 2-iyuldin 5-iyulgha qeder herxil kölemde namayishlar élip bérilghan. 5-Iyul küni gérmaniyening myunxén shehridimu namayish élip bérilghan idi. Shu küni yene gérmaniyening karlsruxé shehiridimu 6 teshkilatning birleshme namayishi bolup ötken.

Karlsruxé shehiridin bizni melumat bilen teminligen enwer ehmet ependining bildürüshiche, namayishqa Uyghurlar we gérmanlardin sirt, ukra'inaliqlarmu qatnashqan. U bu qétimqi namayishning jushqun keypiyatta ötkenlikini eskertti.

5-Iyul küni yene gollandiyening amstérdam shehiridiki dam meydanida namayish ötküzülgen. Xitayning jaza lagérliridiki tutqunlarning kéyimlirige oxshash mehbusluq kéyimlirini kiygen we qollirida ay-yultuzluq kök bayraqlarni kötürgen Uyghurlar bu awat sayahet merkizidiki kishilerning diqqitini jelp qilghan.

RFA/Ekrem

Dam meydanidiki namayishqa qatnashqan jaza lagéri shahidi qelbinur sidiq xanim amstérdamdiki namayish heqqide bizni qisqiche melumat bilen teminlidi. Uning bildürishiche, bu qétimqi namayishni köpligen kishiler közetken we Uyghurlar heqqide türlük so'allarni sorashqan.

Melum bolushiche, yawropadiki Uyghurlar topliship olturaqlashqan köpligen sheherlerde 2-iyuldin 5-iyulgha qeder herxil kölemde namayishlar élip bérilghan.