Явропа әллиридә «5-июл қирғинчилиқи» кәң көләмдә хатириләнди

Ихтиярий мухбиримиз әкрәм
2019-07-08
Елхәт
Пикир
Share
Принт

5-Июл күни германийә, норвегийә, белгийә, шиветсийә қатарлиқ дөләтләрдиму «5-июл қирғинчилиқи» ниң 10 йиллиқи кәң көләмдә хатириләнди.

Д у қ ниң чақириқи билән 7-айниң 5-күни дуняниң һәрқайси җайлиридики уйғурлар топлишип олтурақлашқан 14 дөләт, 22 шәһәрдә «5-июл қирғинчилиқи» ниң 10 йиллиқини кәң көләмдә хатириләш паалийәтлири елип берилғаниди. явропадики бирқисим дөләтләрдиму бу паалийәт охшимиған көләмдә өткүзүлди.

5-Июл күни германийәниң мюнхен шәһиридә «5-июл қирғинчилиқи» ни хатириләш намайиши өткүзүлүпла қалмай, шу күни йәнә германийәниң карлсруһә шәһиридиму намайиш елип берилди.

Бу қетимқи намайишқа иштирак қилған д у қ аяллар комитетиниң мудири амангүл ханимниң билдүрүшичә, карлсруһәдики намайишни «карлсруһә кишилик һоқуқ тәшкилати», «хәтәр астидики хәлқләр тәшкилати» қатарлиқ тәшкилатлар бирликтә уюштурған.

Нелупәр ханимниң баян қилишичә, бу қетимқи намайишта нуқтилиқ һалда җаза лагерлири мәсилиси тонуштурулған.

7-Айниң 6-күни карлсруһә шәһиридә йәнә җаза лагерлири мәсилисини тонутуш үчүн германийәдә ялғуз кишилик намайишни башлиған абдулла билән д у қ тәтқиқат мәркизи мудири әнвәр әһмәт әпәндиләр рәсим көргәзмә паалийити өткүзгән. Абдулла әпәнди бу һәқтә өз қарашлирини баян қилип өтти. Әнвәр әһмәт әпәндиму бу паалийәтниң наһайити яхши өткәнликини тәкитлиди.

5-Июл күни норвегийәдиму «норвегийә кишилик һоқуқ комитети» ниң уюштурушида кәң көләмдә намайиш елип берилған. Норвегийәдә турушлуқ д у қ тәптиши пәрһат яқуп әпәндиниң әскәртишичә, бу намайиш наһайити дағдуғилиқ өткүзүлгән. Намайишқа қатнашқан рәна ханим бу қетимқи намайишниң хитай әлчиханиси алдида өткүзүлгәнликини қәйт қилди.

Белгийәниң пайтәхти бирюссел шәһиридиму «белгийә уйғур җәмийити» ниң тәшкиллиши билән 5-июл күни һаяҗанлиқ бир намайиш болуп өткән. Белгийә уйғур җәмийитиниң рәиси яшар әпәнди бу һәқтә тохталғанда, бу қетимқи намайишниң явропа парламенти алдидики луксимбург мәйданида өткүзүлгәнликини әскәртти.

«5-Июл қирғинчилиқи» ни хатириләш намайиши йәнә шиветсийәниң ситокһолм шәһиридиму өткүзүлгән. Шиветсийәдики «шәрқий түркистан маарип җәмийити» ниң рәһбәрлиридин абдуллам әпәнди бизни бу һәқтә мәлуматлар билән тәминлиди.

5-6-Июл күнлири явропадики фирансийә, голландийә, шивейитсарийә қатарлиқ дөләтләрдиму «5-июл қирғинчилиқи» ни хатириләш паалийәтлири охшимиған шәкилләрдә өткүзүлгән.

Пикирләр (0)
Share
Толуқ бәт