Муз арисидин җәсити тепилған 5 яшлиқ балиниң аниси ғулҗадики түрмидә, дадисиниң лоптики лагерда икәнлики дәлилләнди

Мухбиримиз шөһрәт һошур
2019-12-18
Елхәт
Пикир
Share
Принт
Аниси ғулҗида түрмидә, дадиси лопта лагерға соланған, муз арисидин чиқиривелинған 5 яшлиқ балиниң әтрапида кишиләр көз йеши қилмақта.
Аниси ғулҗида түрмидә, дадиси лопта лагерға соланған, муз арисидин чиқиривелинған 5 яшлиқ балиниң әтрапида кишиләр көз йеши қилмақта.
Social Media

16-Декабир күни иҗтимаий таратқуларда бир кичик балиниң җәситиниң муз арисидин чиқириливатқанлиқи вә әтраптики кишиләрниң йиғлаватқанлиқи көрситилгән бир син көрүнүш тарқалған иди. Мухбиримизниң иҗтимаий ахбаратлардики йип учлириға асасән елип барған телефон зиярәтлири давамида мәзкур паҗиәниң лоп наһийә сампул йеза қарқий кәнтидә йүз бәргәнлики, балиниң анисиниң ғулҗадики бир түрмидә, дадисиниң болса лоптики лагерда икәнлики дәлилләнди.

16-Декабир күни иҗтимаий таратқуларда тарқалған бир син көрүнүшидә бир топ кишиләрниң бир кичик балини муз арисидин чиқириватқан вә йиғлишиватқан көрүнүши тарқалған. Бу һәқтә таратқулардики инкасларда балиниң 5 яш икәнлики, исминиң нәсрулла икәнлики вә лоп наһийәсиниң сампул йеза қарқий кәнтигә нопуслуқ икәнлики тилға елинған.

Биз бу йип учлириға асасән лоп наһийәсигә қарита бир қатар телефон зиярәтлири елип бардуқ. Йезилиқ сақчихана вә йезилиқ һөкүмәтниң торлардики телефон номурлири ишлимигәндин кейин, биз мәзкур йезидики аһалиләргә телефон қилдуқ. Аһалиләрдин бири мәзкур паҗиә һәққидә өзи тәвә кәнттә мәхсус йиғин ечип хәвәр қилинғанлиқини тилға алди.

Аһалиләрдин йәнә бири мушу дүшәнбә күни, йәни 16-декабир күни кәнттә байрақ чиқириш мурасимида уқуп өтүлгән уқтурушқа асасән баян қилишичә, бәш яшлиқ нәсрулла шәнбә күни бирқанчә балилар билән сиртта ойнаветип өстәң бойиға йеқинлашқан вә су ичмәкчи болғанда тейилип кетип өстәңгә чүшүп кәткән.

Сампул йезисидики кәнт кадирлиридин бириниң баян қилишичә, нәсрулланиң дадисиниң исми исми йүсүп тохти, аниси бүвипатәм турсунрози икән. Нөвәттә 28 яшлиқ йүсүп тохти лоптики лагерда, 27 яшлиқ бүвипатәм ғулҗадики бир түрмидә икән. Бүвипатәм 2 йил бурун аталмиш «қанунсиз диний тәблиғ» қә қатнашқанлиқи үчүн 10 йиллиқ кесиветилгән, йолдиши йүсүп тохти аялиниң аталмиш «җинайити» сәвәблик «тәрбийәләш» кә әкетилгән икән. Аилидики ялғуз бала нәсрулла кесәлчан бовиси билән момисиниң беқишиға қалған икән. 71 яшлиқ бовай мәттохти имин билән 68 яшлиқ момай қәмәр сайимниң балиға әгишип сиртқа чиққудәк һали болмиғанлиқи үчүн балиниң өстәңгә чүшүп кетиш қазасидин қошниларниң васитиси билән бир күн кейин хәвәр тапқан.

Мәлум болушичә, әтраптики аһалиләр аридин 5 күн өткән болсиму, әмма нәсрулланиң түрмә вә лагерлардики ата-анисиниң балисиниң йүзини көрүш яки дәпнә мурасими өткүзүш үчүн өйигә қайтқанлиқи һәққидә һечқандақ учур алмиған.

Пикирләр (0)
Share
Толуқ бәт