Корлида қәшқәр вә хотәндин кәлгән ишләмчиләрниң пәрзәнтлирини һәқсиз оқутқан «606 тил техника мәктипи» ниң пүтүн оқутқучилири тутқун қилинған

Мухбиримиз шөһрәт һошур
2019-10-29
Елхәт
Пикир
Share
Принт
«606 Тил техника мәктипи» ниң тутуп кетилгән 6 нәпәр оқутқучисиниң бири алтунгүл исмаил.
«606 Тил техника мәктипи» ниң тутуп кетилгән 6 нәпәр оқутқучисиниң бири алтунгүл исмаил.
Photo: RFA

Өткән айдики ениқлашлиримиз давамида корлидики «җаһан пул муамилә ширкити» ниң саһиби вә «606 тил мәктипи» ниң қурғучилиридин бири, карханичи һәсәнҗан исмаилниң тутқун қилинғанлиқи ашкариланғаниди. У қурған мәктәпниң әһвали һәққидә елип барған кейинки ениқлашлиримизда, мәзкур мәктәптики 6 нәпәр оқутқучиниң, қәшқәр вә хотәндин корлиға ишләмчиликкә кәлгән аһалиләрниң пәрзәнтлирини һәқсиз оқутқанлиқи үчүн тутқун қилинғанлиқи ашкариланди. Төвәндә мухбиримиз шөһрәт һошурниң бу һәқтә тәйярлиған программиси диққитиңларда болиду.

Тутқундики карханичи һәсәнҗан исмаилниң корлидики «606 тил техника» мәктипи һәққидә елип барған ениқлишлимиз давамида, корлидики вәзийәттин хәвәрдар кишиләрдин бири, мәзкур мәктәпниң 6 нәпәр оқутқучисиниң өткән йили 10 ‏-айда тутқун қилинғанлиқини ашкарилиди. Униң дейишичә, корлида иқтисадий үнүм билән бирликтә, бәлгилик иҗтимаий үнүмму һасил қилған бу мәктәп, карханичи һәсәнҗан исмаил тутқун қилинғандин кейин, хитай сақчилириниң техиму илгириләп тәкшүрүш обйектиға айланған. Тәкшүрүш нәтиҗисидә хотән вә қәшқәрдин корлиға ишләмчиликкә кәлгән аһалиләрниң пәрзәнтлирини һәқсиз оқутқанлиқи вә бу һәқсиз оқуған оқуғучиларниң бәзилириниң дадиси яки анисиниң лагерда икәнлики ашкариланған. Буниң билән мәзкур мәктәпниң алтунгүл исмаил қатарлиқ 6 нәпәр оқутқучиси җинайәтчиләргә һесдашлиқ қилиш гумани билән тутуп кетилгән. 

Корлидики алақидар хадимлар, «606 тил техника мәктипи» оқутқучилириниң әһвали һәққидә мәлумат беришни изчил һалда рәт қилди. 

«606 Тил техника мәктипи» ниң йәнә бир қурғучиси, тутқундики карханичи һәсәнҗан исмаилниң шерики, нөвәттә билгийәдә яшаватқан муһаҗир елиҗан әмәт, мәзкур мәктәпниң әйни чағларда, қәшқәр вә хотәндин ишләмчиликкә кәлгән аһалиләрниң пәрзәнтлирини һәқсиз оқутқанлиқини дәлиллиди. Униң дейишичә, әйни чағда ишләмчи аһалиләрниң балилириниң өз тәвәликидә оқуши тәләп қилинғачқа, улар корлидики пахта териш қатарлиқ ишләпчиқиришниң җиддий мәзгиллиридә оқушсиз қалған. Мәзкур мәктәп, уларни һәқсиз тәрбийәләш арқилиқ бу өсмүрләрниң қиммәтлик мәзгилиниң набут болуп кетишиниң алдини алған. Елиҗан әмәтниң дейишичә, «606 тил техника мәктипи» қурулуш җәрянидила хитай даирилириниң көп қетим тосқунчилиқиға учриған. Елиҗан әмәт, мәзкур мәктәпниң алтунгул исмаил, әхмәтҗан, турғун вә абдусалам қатарлиқ оқутқучилириниң тутқунда икәнликидин өзиниңму йеқинда хәвәр тапқанлиқини ейтти. Униң дейишичә, алтунгүл исмаил тутқундики карханичи һәсәнҗан исмаилниң сиңлиси болуп, у йолдеши абдусалам билән бирликтә, ‏1-авғуст йеза игилик университетидики хизмитидин ваз кечип, йолдиши билән бирликтә, акиси тәсис қилған «606 тил мәктипи» дә ишләватқан икән. 

Һөрмәтлик радио аңлиғучилар, юқурида «606 тил техника мәктипи» ниң 6 нәпбәр оқутқучисиниң тутқунда икәнлики һәққидә аңлитиш бәрдуқ.

Пикирләр (0)
Share
Толуқ бәт