Korlida qeshqer we xotendin kelgen ishlemchilerning perzentlirini heqsiz oqutqan "606 Til téxnika mektipi" ning pütün oqutquchiliri tutqun qilin'ghan

Muxbirimiz shöhret hoshur
2019-10-29
Élxet
Pikir
Share
Print
"606 Til téxnika mektipi" ning tutup kétilgen 6 neper oqutquchisining biri altun'gül isma'il.
"606 Til téxnika mektipi" ning tutup kétilgen 6 neper oqutquchisining biri altun'gül isma'il.
Photo: RFA

Ötken aydiki éniqlashlirimiz dawamida korlidiki "Jahan pul mu'amile shirkiti" ning sahibi we "606 Til mektipi" ning qurghuchiliridin biri, karxanichi hesenjan isma'ilning tutqun qilin'ghanliqi ashkarilan'ghanidi. U qurghan mektepning ehwali heqqide élip barghan kéyinki éniqlashlirimizda, mezkur mekteptiki 6 neper oqutquchining, qeshqer we xotendin korligha ishlemchilikke kelgen ahalilerning perzentlirini heqsiz oqutqanliqi üchün tutqun qilin'ghanliqi ashkarilandi. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Tutqundiki karxanichi hesenjan isma'ilning korlidiki "606 Til téxnika" mektipi heqqide élip barghan éniqlishlimiz dawamida, korlidiki weziyettin xewerdar kishilerdin biri, mezkur mektepning 6 neper oqutquchisining ötken yili 10 ‏-ayda tutqun qilin'ghanliqini ashkarilidi. Uning déyishiche, korlida iqtisadiy ünüm bilen birlikte, belgilik ijtima'iy ünümmu hasil qilghan bu mektep, karxanichi hesenjan isma'il tutqun qilin'ghandin kéyin, xitay saqchilirining téximu ilgirilep tekshürüsh obyéktigha aylan'ghan. Tekshürüsh netijiside xoten we qeshqerdin korligha ishlemchilikke kelgen ahalilerning perzentlirini heqsiz oqutqanliqi we bu heqsiz oqughan oqughuchilarning bezilirining dadisi yaki anisining lagérda ikenliki ashkarilan'ghan. Buning bilen mezkur mektepning altun'gül isma'il qatarliq 6 neper oqutquchisi jinayetchilerge hésdashliq qilish gumani bilen tutup kétilgen. 

Korlidiki alaqidar xadimlar, "606 Til téxnika mektipi" oqutquchilirining ehwali heqqide melumat bérishni izchil halda ret qildi. 

"606 Til téxnika mektipi" ning yene bir qurghuchisi, tutqundiki karxanichi hesenjan isma'ilning shériki, nöwette bilgiyede yashawatqan muhajir élijan emet, mezkur mektepning eyni chaghlarda, qeshqer we xotendin ishlemchilikke kelgen ahalilerning perzentlirini heqsiz oqutqanliqini delillidi. Uning déyishiche, eyni chaghda ishlemchi ahalilerning balilirining öz tewelikide oqushi telep qilin'ghachqa, ular korlidiki paxta térish qatarliq ishlepchiqirishning jiddiy mezgilliride oqushsiz qalghan. Mezkur mektep, ularni heqsiz terbiyelesh arqiliq bu ösmürlerning qimmetlik mezgilining nabut bolup kétishining aldini alghan. Élijan emetning déyishiche, "606 Til téxnika mektipi" qurulush jeryanidila xitay da'irilirining köp qétim tosqunchiliqigha uchrighan. Élijan emet, mezkur mektepning altun'gul isma'il, exmetjan, turghun we abdusalam qatarliq oqutquchilirining tutqunda ikenlikidin öziningmu yéqinda xewer tapqanliqini éytti. Uning déyishiche, altun'gül isma'il tutqundiki karxanichi hesenjan isma'ilning singlisi bolup, u yoldéshi abdusalam bilen birlikte, ‏1-awghust yéza igilik uniwérsitétidiki xizmitidin waz kéchip, yoldishi bilen birlikte, akisi tesis qilghan "606 Til mektipi" de ishlewatqan iken. 

Hörmetlik radi'o anglighuchilar, yuqurida "606 Til téxnika mektipi" ning 6 nepber oqutquchisining tutqunda ikenliki heqqide anglitish berduq.

Toluq bet