Ilham toxti 2019-yilliq "Saxarof mukapati" gha érishti

Ixtiyariy muxbirimiz ekrem
2019-10-24
Élxet
Pikir
Share
Print
Yawropa parlaméntining re'isi dawid sassoli ependi 2019-yilliq "Saxarof mukapati" ning ilham toxti ependige bérilgenlikini élan qildi we ilham toxtini tonushturdi. 2019-Yili 24-öktebir, firansiye.
Yawropa parlaméntining re'isi dawid sassoli ependi 2019-yilliq "Saxarof mukapati" ning ilham toxti ependige bérilgenlikini élan qildi we ilham toxtini tonushturdi. 2019-Yili 24-öktebir, firansiye.
REUTERS

Xitay türmisidiki Uyghur ziyaliysi ilham toxtigha yawropa ittipaqining eng aliy kishilik hoquq mukapati bolghan "Saxarof mukapati" bérildi.

24-Öktebir küni ilham toxtigha yawropa ittipaqining eng aliy kishilik hoquq mukapati bolghan "Saxarof mukapati" ning bérilgenliki bügünki gherb taratqulirining eng qiziq xewer témisi boldi. Ilham toxti 9-ayda "Saxarof mukapati" gha namzat körsitilgen axirqi 4 namzatning biri bolup tallan'ghan idi.

Fransiyening strasburg shehiridiki yawropa ittipaqining merkizide 24-öktebir ötküzülgen "Saxarof mukapati" ni élan qilish murasimida yawropa parlaméntining re'isi dawid sassoli söz qilip, ilham toxtining "Uyghur-xitay xelqliri arisidiki di'alog we chüshinishni ilgiri sürgen bir ziyaliy" ikenlikini tilgha aldi.

Melum bolghinidek, ilham toxti ependi xitay hakimiyitining adaletsiz milliy siyasitige qarshi küresh qilghanliqi üchün 2014-yili 9-ayda "Döletni parchilash" jinayiti bilen qolgha élinip, xitay hökümiti teripidin muddetsiz qamaq jazasigha höküm qilin'ghan idi.

Téxi 30-séntebir küni ilham toxti yawropa ittipaqining "Waslaw xawél erkinlik mukapati" gha érishken idi. Uning bir aydin kéyinla yene yawropa birlikining eng aliy mukapati bolghan "Saxarof mukapati" gha érishkenlikining élan qilinishi Uyghur jama'itini köp söyündürüpla qalmastin, "Ilham toxti guruppisi" ning re'isi enwerjan ependinimu bek xursen qilghan.

Enwerjan ependi bu heqte toxtalghanda bu mukapatning ilham toxtigha bérilishining muhim ehmiyetliri toghrisidiki qarashlirini sherhlep ötti. U sözide yene ilham toxti ependining 2014-yilidin buyan érishken xelq'araliq mukapatliri toghrisida etrapliq toxtaldi.

Gherb metbu'atliri bügün 2019-yilliq "Saxarof mukapati" ning ilham toxtigha bérilgenlikini keng teshwiq qilish bilen birge yene ilham toxti mensup bolghan ijtima'iy topluq-milyonlighan bigunah Uyghurlarning xitay hakimiyitining jaza lagérlirida azab chékiwatqanliqinimu teng tilgha almaqta.

Gérmaniyediki Uyghur jama'et erbabi ablimit tursun ependi bu heqte tesiratini bayan qilip, "Bu mukapat xitay hakimiyitining yüzige urulghan bir shapilaq boldi," dédi. Dunya Uyghur qurultiyi tetqiqat merkizining mudiri enwer exmet ependimu bu heqte öz qarashlirini otturigha qoyup ötti.

Yawropa ittipaqining eng aliy mukapati bolghan "Saxarof mukapati" her yili bir qétim kishilik hoquq we erkinlik yolida küresh qilghan shexsler yaki teshkilatlargha bérilidighan bolup, qimmiti 50 ming yawro. Bu mukapat 1988-yili yawropa ittipaqining eng aliy mukapati qilip békitilgen.

(Ilham toxti: men junggo hökümitidin heqqaniyet telep qildim, jinayitim yoq!)

Toluq bet