Истанбулда "абдуреһим өткүр излири" намлиқ әдәбият-сәнәт муһакимә йиғини өткүзүлди

Ихтиярий мухбиримиз арслан
2021-07-08
Share
Истанбулда "абдуреһим өткүр излири" намлиқ әдәбият-сәнәт муһакимә йиғинида мәрһум язғучи абдуреһим өткүр әпәндиниң шиветсийәдә яшаватқан қизи зулһаят өткүр сөзлимәктә. 2021-Йили 8-июл, түркийә.
RFA/Arslan

8-Июл пәйшәнбә күни истанбулда "абдуреһим өткүр излири" намлиқ әдәбият-сәнәт муһакимә йиғини өткүзүлди. Бу муһакимигә уйғур әдәбиятиға қизиқидиған көплигән яш һәвәскарлар қатнашти.

Бу муһакимә йиғини истанбулдики язғучилар җәмийитиниң йиғин залида өткүзүлди. Йиғинда мәрһум язғучи абдуреһим өткүрниң шиветсийәдә яшаватқан нәврә қизи зулһаят өткүр, уйғур әдәбияти тәтқиқатчилиридин мәхмутҗан ясин, яш уйғур шаири имран садайи вә музикант шөһрәт нур қатарлиқ кишиләр сөз қилди. Йиғин җәрянида уйғур әдәбияти вә мәрһум язғучи абдуреһим өткүрниң иҗадийәтлири тоғрисида тәпсилий муһакимә елип берилди.

Зулһаят өткүр ханим абдуреһим өткүрниң иҗадийәтлири тоғрисида тохтилип өтти. У мәрһум язғучи абдурәһим өткүрниң 1980-йилларда "из", "ойғанған земин" қатарлиқ тарихий романларни йезиш җәрянида җапалиқ издиниш елип берип, нурғун материял топлиғанлиқини, қомул районида узун әмәлий тәкшүрүш елип берип төмүр хәлпә вә хоҗанияз һаҗим қатарлиқ миллий инқилаб йетәкчилири вә улар башчилиқ қилған қозғилаңлар тоғрилиқ шаһитларниң көплигән баянлирини үналғуға елип йиғқанлиқини, бу җәрянда 200 данидин артуқ үналғу лентисиниң топланғанлиқини баян қилип өтти.

Йиғинда яш шаир имран садайи мәрһум шаир абдуреһим өткүрниң "из" намлиқ шеирни җараңлиқ декилиматсийә қилип, йиғин иштиракчилириниң қизғин алқишқа еришти.

Зулһаят өткүр ханим сөзидә мәрһум шаир абдуреһим өткүрниң "хәҗлә, хаинлар хәҗлә" дегән шеирниң һазирқи заманғиму уйғун келидиғанлиқини шундақла бу шеирниң йезилиш җәряни һәм арқа көрүнүшидики ечинарлиқ вәқәни сөзләп өтти.

Әдәбият тәтқиқатчиси мәхмутҗан ясин абдуреһим өткүрниң 20-әсирдики уйғур әдәбиятиға һәқиқий рәиштә вәкиллик қилидиған муһим язғучиларниң бири икәнликини тәкитләп өтти. У абдурәһим өткүрниң "мән ақ байрақ әмәс" дегән шеирниң йезилиш сәвәби тоғрисида тохталди. Униң билдүришичә, әйни вақитта хели нами бар бир хитай шаири хантәңри чоққисини ақ байраққа охшитип шеир язғанлиқи мәлум. Буниңдин қаттиқ ғәзәбләнгән абдуреһим өткүр шу вақитта "мән ақ байрақ әмәс" намлиқ шеирини йезип чиққан икән. Мәхмутҗан ясин абдуреһим өткүрниң аяли мәрһум хәлчәм тиләшева ханимдин нәқил кәлтүрүп, бу шеирниң йезилишидики арқа көрүнүшни тонуштуруп өтти.

Йиғин давамида яш шаир имран садайи, музикант шөһрәт нурниң раваб билән тәңкәш қилиши арқисида абдуреһим өткүрниң "мән ақ байрақ әмәс" дегән шеирни җараңлиқ декилиматсийә қилди.

Мәхмутҗан ясин әпәнди абдуреһим өткүрниң пүткүл шеирлириниң хәлқни әркинликкә вә һөрлүккә чақирип кәлгәнликини, һәр бир шеирий мисрасида ана тупраққа вә өз хәлқигә болған ялқунлуқ муһәббәтниң йелинҗап турудиғанлиқини тәкитләп өтти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт