Abduréhim ghéni: “Méning yalghuz kishilik namayishim wetende ghayib bolghan tughqanlirimni sürüshtürüshtin bashlandi”
2020.07.28
Gollandiyede 3 yildin buyan yalghuz kishilik namayishini dawamlashturuwatqan abduréhim ghéni 28-iyul küni radiyomiz ziyaritini qobul qilip, gollandiye paytexti amstérdamning dam meydanida yalghuz kishilik namayishini bashlishigha 2018-yildin buyan alaqisi üzülüp qalghan tughqanlirini sürüshtürüsh seweb bolghanliqini bildürdi.
Abduréhim ependining bildürüshiche, 2018-yili yaz peslidin bashlap, uning yurti uchturpandiki ata-anisi we tughqanliri bilen bolghan barliq alaqisi üzülüp qalghan.
Abduréhim ependi ghayib bolghan uruq-tughqanlirining dérikini yurti uchturpandin köp qétim sürüshtürgenliki, emma izchil türde uchur alalmighanliqi we buning sewebliri heqqide toxtaldi.
Uning bildürüshiche, uchturpandiki ata-anisi we qérindashliri olturushluq qoru-jaylar 2016-yili chéqiwétilip, ular bashqa jaygha köchürüwétilgen iken. Shu sewebtin u köp qétim tirishqan bolsimu, emma ata-ana, bir tughqan qérindashliri bolup, 16 neper tughqinining ehwali heqqide héchqandaq uchur alalmighan. Kéyin u bashqilardin sürüshtürüsh arqiliq ayalining kelpindiki ikki akisi we yenggisining 2017-yilila lagérgha élip kétilgenlik uchurini alghan.
Abduréhim ependi radiyomizgha yollap bergen tizimliktin melum bolushiche, uning uchturpandiki tughqanliridin 72 yashliq dadisi abdughéni xudaberdi, ögey apisi tunisaxan, yekke tijaret qilidighan 52 yashliq chong akisi ablikim ghéni, yenggisi zinnetxan kichik, ularning baliliridin 28 yashliq chong qizi patimem ablikim a'ilisi bilen, 24 yashliq ikkinchi qizi aminem ablikim we uning bala-chaqiliri, ikkinchi akisi mijit ghéni a'ilisidiki 5 jan hemde inisi abdukérim ghéni qatarliqlar bolup, jem'iy 16 neper tughqini 2018-yili yaz peslidin bashlap ghayib bolghan. Sürüshtürüsh arqiliq ayalining aqsu kelpinde oqutquchiliq qilidighan akiliri turghun hamidin, adil hamidin we yenggisi arzugül toxtilarning lagérgha qamalghanliqi heqqide uchur alghan.
Abduréhim ependi yene özining 3 yildin buyan gollandiye tashqi ishlar ministirliqi qatarliq orunlar arqiliq tughqanlirining ehwalini sürüshtürgenlikini bildürdi.
Abduréhim ependining bildürüshiche, u amstérdamdiki dam meydanida yalghuz kishilik namayishini dawam qiliwatqan 3 yil jeryanida sayahetchilerningla diqqitini qozghap qalmastin, belki kishilik hoquq pa'aliyetchiliri, muxbirlar, hetta hökümet erbabliriningmu diqqitini qozghighan.
Abduréhim ghéni 2020-yili 7-ayning 12-küni amérikaning gollandiyediki bash elchisi pété okstra ependi dam meydanigha kelgen chaghda uningdin a'ilisidikiler we Uyghurlarning weziyitini sorighanliqini bildürdi.
Uning bildürüshiche, ashu qétim amérika bash elchisining dam meydanigha kélishi we özi bilen körüshüshi uning yalghuz kishilik namayishni dawamlashturushigha téximu zor ilham bolghan iken.
Yuqiriqi awaz ulinishidin söhbetning tepsilatini anglighaysiler.