Даириләр атушта аһалиләрни сим-тосуқлар билән өйлиригә қамиған, әмма озуқлуқ топливелиш пурсити бәрмигән

Мухбиримиз шөһрәт һошур
2020-02-03
Елхәт
Пикир
Share
Принт
Уйғур диярида даириләр елип бериватқан вирустин мудапиәлиниш тәшвиқатидин көрүнүш. 2020-Йили январ.
Уйғур диярида даириләр елип бериватқан вирустин мудапиәлиниш тәшвиқатидин көрүнүш. 2020-Йили январ.
Social Media

«Вухән вируси» ниң уйғур районидики тарқилиш әһвали вә даириләрниң бу һәқтики алдини елиш тәдбирлири һәққидә мәлумат елиш үчүн мухбиримиз райондики һәр дәриҗилик органлар вә аһалиләргә телефон қилди. Ениқлашлиримиз давамида қәшқәр керәмбағ дохтурханиси, алтай вилайәтлик биринчи дохтурхана вә шихәнзә 2-дохтурханиларниң «вухән вируси» билән юқумланғанлар үчүн мәхсус орун аҗратқанлиқи мәлум болди. Атуштики аһалиләрдин бири йолға қоюлуватқан җиддий һаләттин кейин йәрлик даириләрниң коча доқмушлирини сим-тосуқлар билән тосуп аһалиләрни өйдин чиқмаслиққа буйруғанлиқи, әмма җиддий һаләттин аввал аһалиләргә өйлиригә озуқлуқ топливелиш пурсити бәрмигәнликини ашкарилиди.

Хитай ахбарати 31-январдики хәвәрлиридә уйғур районида «вухән вируси» билән юқумланғанларниң 17 нәпәр икәнликини ашкарилиған иди. Биз бу санниң тоғра яки хаталиқи вә юқумланғанларниң қайси дохтурханида икәнликини айдиңлаштуруш үчүн уйғур районидики һәрқайси сәһийә органлириға телефон қилдуқ. Хадимлардин бири қәшқәрдә бу түр юқумдарларни көзитиш вә давалаш үчүн қәшқәр керәмбағ дохтурханисида мәхсус орун аҗритилғанлиқини ашкарилиди. Әмма керәмбағ дохтурханисиниң һазирға қәдәр бир юқумдарни байқиған яки байқимиғанлиқи мәлум болмиди.

Борталадики сәһийә тармақлири өзлиридә «вухән вируси» юқумдарлириниң барлиқини инкар қилмиди, әмма улар бу һәқтә алдирап мәлумат берәлмәйдиғанлиқини тилға алди.

Мәлум болушичә, хитайниң һәрқайси җайлирида иҗра қилиниватқиниға охшашла уйғур районидиму «вухән вируси» дин мудапийәлиниш үчүн җиддий һаләт йолға қоюлған. Атушниң чәт-яқ йезилиридиму коча доқмушлири сим тосуқлар билән тосалған. Аһалиләр вирустин қоғдиниш һәққидә җиддий агаһландурулған. Аһалиләр кәнт кадирлириниң доклатиға асасән «вухән вируси» ниң уйғур райониға тарқилиш әһвалидин бәлгилик дәриҗидә хәвәр тапқан.

Иҗтимаий ахбаратларда, һәтта хәлқара ахбаратларда дейилишичә, хитай даирилири «вухән вируси» юқумдарлириниң сани вә өлүми һәққидики санлиқ мәлуматларни йошурмақта. Биз һәқиқий әһвални игиләш үчүн алтайдики алақидар тармақларға изчил һалда телефон қилдуқ. Хадимлар вилайәтлик1 ‏-дохтурханида бу вирус юқумдарлири үчүн мәхсус бөлүм аҗритилғанлиқини ашкарилиса, шихәнзәдики даириләр шихәнзә 2‏-дохтурханисиниң мәхсус айрилғанлиқини тилға алди.
Атуштики аһалиләрниң дейишичә, даириләр аһалиләрниң сиртқа чиқишини шу дәриҗидә қаттиқ тосқан болсиму, әмма уларниң өйлиригә йетәрлик озуқлуқ топливелишиға пурсәт бәрмигән. Даириләр бу җиддий һаләтниң 20 күнчә давам қилидиғанлиқини баян қилған.

«Ню-йорк вақти гезити» ниң хәвәр қилишичә, вухән шәһириниң башлиқи бу вирус тарқалғанлиқи вә хәвпи һәққидики учурниң кечиккәнликини етирап қилған. Әмма мәсулийәтни мәркизи һөкүмәткә артқан, йәни хитайниң қанун бойичә мәркәздин уқтуруш кәлмәй туруп, өзиниң бундақ бир ваба һәққидә еғиз ачалмайдиғанлиқини билдүргән.

Хитайда, җүмлидин уйғур районида өйлиригә қапсалған кишиләрниң қанчилик вақит бәрдашлиқ берәләйдиғанлиқи һазирчә мәлум әмәс.

Пикирләр (0)
Share
Толуқ бәт