Серк артиси айгүл мәмәт өз маһарити билән уйғурларни дуняға йәнә бир қетим тонутти

Мухбиримиз гүлчеһрә
2019-05-08
Елхәт
Пикир
Share
Принт
Серк артиси айгүл мәмәт америка дөләтлик васкетбол җәмийитиниң торонтода өткүзүлгән мусабиқә җәрянида, тәклип билән бир мәйдан оюн көрсәтти. 2019-Йили 7-май, канада.
Серк артиси айгүл мәмәт америка дөләтлик васкетбол җәмийитиниң торонтода өткүзүлгән мусабиқә җәрянида, тәклип билән бир мәйдан оюн көрсәтти. 2019-Йили 7-май, канада.
RFA/Gülchéhre

Америка дөләтлик васкетбол җәмийитиниң сәйшәнбә кәч торонтода өткүзүлгән бир мәйдан мусабиқиси арилиқида, тәклип билән оюн көрсәткән уйғур серк артиси айгүл мәмәт, уйғур нахшисиға маслаштуруп, нәпс уйғур усул һәрикәтлири билән орундиған юқири техникилиқ серк маһарити зор алқишқа еришкән. Өз маһарити билән дуня сәһнисидә йәнә бир қетим уйғурларни тонутқан айгүл зияритимизни қобул қилип, «мән уйғур дегән мушундақ дәп бир мәйдан намайиш қилғандәк болдум» дәйду.

7-Май күни канаданиң торонто шәһәр мәркизидики әң чоң тәнтәрбийә залида америка дөләтлик васкетбол җәмийитиниң дәриҗидин ташқири васкетбол кәспий мусабиқиси болуп өтти. Канадада өткүзүлгән бу қетимқи мусабиқидә торонто рәптерс командиси билән америка «фладелфийә 76» командиси риқабәтләшкән болуп, бу мусабиқә җәряни һәр қайси телевизийә қаналлирида бирла вақитта нәқ мәйдандин тарқитилди. Мәзкур мусабиқини йәнә 20 миңдин артуқ адәм нәқ мәйдандин көргән болуп, мусабиқә арисида туюқсиз яңриған уйғурчә нахша барлиқ тамашибинларниң алаһидә диққитини тартқан.

Айгүл мәмәт уйғур әнәниви нусхилар билән лайиһиләнгән көк рәңлик сәһнә кийими кийип, «уйғур дегән мушундақ» дегән нахшиға җор болуп, уйғур усули кириштүрүлгән чәмбирәк ойнитиш маһаритини орундап, уйғурларни йәнә бир қетим дуня әһлигә тонуштурған.

Нөвәттә айгүл мәмәтниң бу хәлқаралиқ мусабиқидә көрсәткән оюниниң син көрүнүшлири иҗтимаий таратқуларда таралмақта. Инкаслардин мәлум болушичә, уйғурлар хитай тәрипидин мәдәнийәт қирғинчилиқиға учраватқан, уйғурларниң нахша музикилири йоқитиливатқан, уйғурларниң бир қисим даңдар артислири лагерларға қамалған мушундақ бир вәзийәттә, уйғурларниң тонулған серк артиси айгүл мәмәтниң қайтидин дуняви бир мәйданда өз маһаритини уйғур сәнити билән бирләштүрүп намаян қилиши чәтәлләрдики уйғур җамаитигә зор илһам бәхш әткән.

Торонтода өткүзүлгән бу васкетбол мусабиқисини тамашибин сүпити билән нәқ мәйдандин көргән уйғур яш султан, өзи бир васкетбол һәвәскари болсиму, бирақ өзини мусабиқидин бәкрәк һаяҗанландурғини бу мәйданда уйғур нахшисиниң яңриши вә уйғур артисниң тамашибинларға юқири сәвийәлик серк маһаритини көрситип һәмминиң алаһидә алқишиға еришкәнлики болғанлиқини билдүрди. У: «бу мәйданда уйғурлардин вә уйғурлуқумдин пәхирләндим» дәйду.

Балилирини әмдила мәктәпкә апирип қоюп қайтқан айгүл мәмәт торунтодин телефон зияритимизни қобул қилди. Бу, айгүлниң канадаға келип панаһлиқ тиләп қалғандин кейин мәзкур мусабиқә мәйданида 10-қетим оюн қоюши икән.

Айгүл мәзкур оюн қоюш пурситини уйғурларни вә уйғур мәдәнийәт сәнитини тонутидиған яхши пурсәт дәп билип, кийими вә музикисини өзи таллаш шәрти билән оюн қоюш тәклипини қобул қилған. Айгүл: «бу қетимлиқ оюнни худди намайиш қилғандәк қоюп кәлдим, мән уйғур, биз уйғурлар мушундақ дәп көрситәлигинимдин өзүмму бәк һаяҗанландим» дәйду.

Айгүл мәмәт 2012-йили канада талант сәһнисидики үч қетимлиқ таллаш мусабиқисидә көрсәткән серк маһарәтлириниң һәммисини юқири техника билән вайиға йәткүзүп орундап ахирқи таллашқа киргән. Гәрчә у нөвәт чемпийонлуқ таҗи айгүл мәмәткә несип болмиған болсиму, бирақ әйни вақитта у канада мәтбуатлириниң зияритини қобул қилғанда, өзиниң уйғур миллитидин икәнликини, вәтинидики уйғурларниң хитай һөкүмитиниң диний һәм сиясий җәһәтләрдики бастурушиға учрап келиватқан милләт икәнликини илгири сүргән иди.

Айгүл 2004-йили хитай һөкүмити тәшкиллигән серк өмики тәркибидә канадаға оюн қоюшқа кәлгинидә, канада һөкүмитидин сиясий панаһлиқ тиләп қелип қалған 7 нәпәр уйғур серк артисиниң биридур. У, һазирғичә һәр хил қийинчилиқларни йеңип, өз кәспини ташлимай давамлаштурмақта. Серк кәспидә уйғурлар вә канада хәлқиниң қәлбидә һөрмәткә сазавәр чолпанға айланған милләтсөйәр сәнәткар айгүл нөвәттә йәнә, торонтода мәхсус серк вә гимнастика тәнһәрикәт түрлиридә талантлиқ әвладларни тәрбийәләш билән шуғулланмақта.

Пикирләр (0)
Share
Толуқ бәт