Sérk artisi aygül memet öz mahariti bilen Uyghurlarni dunyagha yene bir qétim tonutti

Muxbirimiz gülchéhre
2019-05-08
Élxet
Pikir
Share
Print
Sérk artisi aygül memet amérika döletlik waskétbol jem'iyitining torontoda ötküzülgen musabiqe jeryanida, teklip bilen bir meydan oyun körsetti. 2019-Yili 7-may, kanada.
Sérk artisi aygül memet amérika döletlik waskétbol jem'iyitining torontoda ötküzülgen musabiqe jeryanida, teklip bilen bir meydan oyun körsetti. 2019-Yili 7-may, kanada.
RFA/Gülchéhre

Amérika döletlik waskétbol jem'iyitining seyshenbe kech torontoda ötküzülgen bir meydan musabiqisi ariliqida, teklip bilen oyun körsetken Uyghur sérk artisi aygül memet, Uyghur naxshisigha maslashturup, neps Uyghur usul heriketliri bilen orundighan yuqiri téxnikiliq sérk mahariti zor alqishqa érishken. Öz mahariti bilen dunya sehniside yene bir qétim Uyghurlarni tonutqan aygül ziyaritimizni qobul qilip, "Men Uyghur dégen mushundaq dep bir meydan namayish qilghandek boldum" deydu.

7-May küni kanadaning toronto sheher merkizidiki eng chong tenterbiye zalida amérika döletlik waskétbol jem'iyitining derijidin tashqiri waskétbol kespiy musabiqisi bolup ötti. Kanadada ötküzülgen bu qétimqi musabiqide toronto reptérs komandisi bilen amérika "Fladélfiye 76" komandisi riqabetleshken bolup, bu musabiqe jeryani her qaysi téléwiziye qanallirida birla waqitta neq meydandin tarqitildi. Mezkur musabiqini yene 20 mingdin artuq adem neq meydandin körgen bolup, musabiqe arisida tuyuqsiz yangrighan Uyghurche naxsha barliq tamashibinlarning alahide diqqitini tartqan.

Aygül memet Uyghur en'eniwi nusxilar bilen layihilen'gen kök renglik sehne kiyimi kiyip, "Uyghur dégen mushundaq" dégen naxshigha jor bolup, Uyghur usuli kirishtürülgen chembirek oynitish maharitini orundap, Uyghurlarni yene bir qétim dunya ehlige tonushturghan.

Nöwette aygül memetning bu xelq'araliq musabiqide körsetken oyunining sin körünüshliri ijtima'iy taratqularda taralmaqta. Inkaslardin melum bolushiche, Uyghurlar xitay teripidin medeniyet qirghinchiliqigha uchrawatqan, Uyghurlarning naxsha muzikiliri yoqitiliwatqan, Uyghurlarning bir qisim dangdar artisliri lagérlargha qamalghan mushundaq bir weziyette, Uyghurlarning tonulghan sérk artisi aygül memetning qaytidin dunyawi bir meydanda öz maharitini Uyghur sen'iti bilen birleshtürüp namayan qilishi chet'ellerdiki Uyghur jama'itige zor ilham bexsh etken.

Torontoda ötküzülgen bu waskétbol musabiqisini tamashibin süpiti bilen neq meydandin körgen Uyghur yash sultan, özi bir waskétbol heweskari bolsimu, biraq özini musabiqidin bekrek hayajanlandurghini bu meydanda Uyghur naxshisining yangrishi we Uyghur artisning tamashibinlargha yuqiri sewiyelik sérk maharitini körsitip hemmining alahide alqishigha érishkenliki bolghanliqini bildürdi. U: "Bu meydanda Uyghurlardin we Uyghurluqumdin pexirlendim" deydu.

Balilirini emdila mektepke apirip qoyup qaytqan aygül memet toruntodin téléfon ziyaritimizni qobul qildi. Bu, aygülning kanadagha kélip panahliq tilep qalghandin kéyin mezkur musabiqe meydanida 10-qétim oyun qoyushi iken.

Aygül mezkur oyun qoyush pursitini Uyghurlarni we Uyghur medeniyet sen'itini tonutidighan yaxshi purset dep bilip, kiyimi we muzikisini özi tallash sherti bilen oyun qoyush teklipini qobul qilghan. Aygül: "Bu qétimliq oyunni xuddi namayish qilghandek qoyup keldim, men Uyghur, biz Uyghurlar mushundaq dep körsiteliginimdin özümmu bek hayajanlandim" deydu.

Aygül memet 2012-yili kanada talant sehnisidiki üch qétimliq tallash musabiqiside körsetken sérk maharetlirining hemmisini yuqiri téxnika bilen wayigha yetküzüp orundap axirqi tallashqa kirgen. Gerche u nöwet chémpiyonluq taji aygül memetke nésip bolmighan bolsimu, biraq eyni waqitta u kanada metbu'atlirining ziyaritini qobul qilghanda, özining Uyghur millitidin ikenlikini, wetinidiki Uyghurlarning xitay hökümitining diniy hem siyasiy jehetlerdiki basturushigha uchrap kéliwatqan millet ikenlikini ilgiri sürgen idi.

Aygül 2004-yili xitay hökümiti teshkilligen sérk ömiki terkibide kanadagha oyun qoyushqa kelginide, kanada hökümitidin siyasiy panahliq tilep qélip qalghan 7 neper Uyghur sérk artisining biridur. U, hazirghiche her xil qiyinchiliqlarni yéngip, öz kespini tashlimay dawamlashturmaqta. Sérk kespide Uyghurlar we kanada xelqining qelbide hörmetke sazawer cholpan'gha aylan'ghan milletsöyer sen'etkar aygül nöwette yene, torontoda mexsus sérk we gimnastika tenheriket türliride talantliq ewladlarni terbiyelesh bilen shughullanmaqta.

Toluq bet