Турпанда сақчи аилә-тавабиати баһаргүл һәбибулланиң кесиветилгәнлики дәлилләнди

Мухбиримиз шөһрәт һошур
2020-04-23
Елхәт
Пикир
Share
Принт
80 яшлиқ сабиқ сақчи башлиқи һәбибулла абдулланиң қизи баһаргүл һәбибулла ери билән. 2016-Йили турпан.
80 яшлиқ сабиқ сақчи башлиқи һәбибулла абдулланиң қизи баһаргүл һәбибулла ери билән. 2016-Йили турпан.
Melikizat teminligen

Йеқинқи мәзгилләрдә иҗтимаий ахбаратларда, турпанда 80 яшлиқ сабиқ сақчи башлиқи һәбибулла абдулла вә униң сақчи саһәсидә хизмәт қиливатқан пәрзәнтлиридин болуп аилисидин җәмий 7 кишиниң тутқунда икәнлики хәвәр қилинғаниди. Әмма бу учур даириләр тәрипидин техи дәлилләнмигән иди. 23-Апрел күни мухбиримизниң телефонини қобул қилған аптоном районлуқ юқири сотниң бир хадими, мәзкур аилидики тутқунлардин баһаргүл һәбибулланиң кесиветилгәнлики вә униң бу һөкүмгә наразилиқ билдүргәнликини ашкарилиди.

Мәзкур аилиниң түркийәдә яшаватқан әзаси мәликизат һәбибулланиң гуваһлиқ баянатлиридин мәлум болушичә, сабиқ сақчихана башлиқи, 80 яшлиқ һәбибулла абдулла, турпанниң чатқал йезилиқ сақчиханисида 30 йилчә хизмәт қилғандин кейин 1997 ‏-йили дәм елишқа чиққан. У 2017 ‏-йили, 4 ‏-айда 75 яшлиқ аяли бүмәрйәм турсун билән бирликтә намәлум хаталиқи сәвәблик «тәрбийәләш» мәркизигә әкетилгән. Арқидин уларниң түрмә вә сақчиханиларда ишләватқан пәрзәнтлири алим һәбибулла вә меһрай һәбибулла; арқидин мәктәп вә ширкәтләрдә ишләватқан пәрзәнтлири айгүл һәбибулла, мәмәт һәбибулла вә баһаргүл һәбибулларму тутуп кетилгән.

Сақчи саһәсидә узун вә актип ишлигән, һәтта мукапатларға еришкән бу аилә әзалириниң әһвали һәққидә илгири көп қетимлап ениқлаш елип барған болсақму, даириләр бу һәқтә мәлум беришни рәт қилип кәлгән. 22-Апрел күни турпанға қарита елип барған телефон зиярәтлиримиз давамида, бу сақчи аилә тавабиатлириниң әһвали һәққидә йәнә бир қетим мәлумат сүрүштә қилдуқ.

Сақчи саһәсидики көпинчә хадимлар, бу һәқтә мәлумат бериштин йәнила өзини тартти. Биз турпан шәһәрлик җ х идарисидики мәлум бир хадимдин өзиниң бөлүм башлиқини сориғинимизда, у мәзкур башлиқниң аптоном районлуқ юқири соттин кәлгән хизмәт гурупписи билән мәшғул икәнликини ейтти. У йәнә соалимизға җавабән, бу гуруппиниң мәһкум баһаргүл һәбибулланиң делосиға қайтидин қарап чиқиватқанлиқини әскәртти. Биз бу хадим тәминлигән телефон номури бойичә, юқири соттин кәлгән хадим билән алақиләштуқ. Бу хадим баһаргүл һәбибулланиң делоси һәққидә тәпсилий мәлумат бәрмигән болсиму, өзиниң турпанға бу дело сәвәблик кәлгәнликини инкар қилмиди. Биз униңдин баһаргүл һәбибулланиң делосиниң қайси басқучқа кәлгәнликини сориғинимизда, бу һәқтә рәһбирий хадимлар билән сөзлишишимизни тәвсийә қилиш арқилиқ, униң делосиниң техи хуласиси чиқмиғанлиқини ишарәтлиди. Бу хадим телефонимизни қоювәткәндин кейин, биз мәзкур сақчи аилиси һәққидә иҗтимаий таратқуларда изчил гуваһлиқ берип келиватқан мәликизат һәбибулла ханимни зиярәт қилдуқ. Мәликизатниң, тутқундики аилә әзалири һәққидә игилигән әң йеқинқи учурлириға асасән баян қилишичә, униң дадиси, аниси вә чоң һәдиси лагерда бир йерим йил әтрапида ятқандин кейин қоюп берилгән. Әмма акиси-түрмә хадими алим һәбибулла билән сақчи һәдиси меһрай һәбибулла вә акиси мәмәт һәбибулла 3 йиллиқтин кесилгән; бир страхиванийә ширкитидә ишләйдиған кичик һәдиси баһаргүл һәбибулла бәш йиллиқ кесиветилгән.

Телефонимиз қайта бағланған мәзкур юқири сот хадими, баһаргүл һәбибулланиң кесиветилгәнлики вә һөкүмгә наразилиқ билдүргәнлики, шуңа өзлириниң турпанға баһаргүл билән сөһбәт өткүзгини кәлгәнликини ашкарилиди.

Мәликизат һазирға қәдәр бу тутқундики қериндашлириниң нәдә икәнлики, йәни қамақхана яки лагерда икәнлики һәққидә учур алалмай келиватқаниди. Мәзкур хадим, баһаргүл һәбибулла билән екранда сөзләшкәнликини баян қилиш арқилиқ униң техичә қамақхана яки лагерда икәнликини ашкарилиди.

Илгирики игиләшлиримиздин мәлум болушичә, лагердики тутқунларниң көплүки сәвәблик, мутләқ көп сандики тутқунлар, сот органлириниң қарари билән әмәс, сиясий қанун ишханилириниң музакирилири билән бир тәрәп қилинмақта. Сотсиз чиқирилған бу һөкүмләр, мәһкум аилилиригә хизмәт гуруппилири арқилиқ йәткүзүлмәктә.

Биз мәзкур хадимдин баһаргүл һәбибулла үстидин сотниң қайта қачан ечилидиғанлиқини сориғинимизда, буниң пәқәт «музакирә қилиниш» еһтималлиқи барлиқини ейтти.

Мана бу җаваб, баһаргүл һәбибулланиң тәқдириниң уйғур районидики милйонларчә тутқунға охшашла сиясий қарар вә музакирә билән бир тәрәп қилинидиғанлиқидин бешарәт бәрмәктә.

Бу учурлардин йәнә, көп сандики мәһкумлардин пәрқлиқ һалда, баһаргүл һәбибулланиң наразилиқиниң диққәт етибарға елинғанлиқи мәлум. Әмма буниңға сәвәб болған амилниң униң сақчи аилә тавабиати болуштәк аилә арқа көрүнүши икәнлики вә яки түркийәдики сиңлиси мәликизат һәбибулланиң гуваһлиқ баянатлириниң түрткә болғанлиқи мәлум әмәс.

Бу йил 38 яшқа киргән баһаргүл һәбибулла 4 вә 9 яшлиқ икки балиниң анисидур.

Һөрмәтлик радио аңлиғучилар, юқирида 30 йиллиқ сақчи башлиқи һәбибулла абдулланиң тутқундики 4 пәрзәнтидин баһаргүл һәбибулланиң кесилгәнлики вә баһаргүлниң бу һөкүмгә қарита наразилиқиға қайта қариливатқанлиқи һәққидә аңлитиш бәрдуқ.

Пикирләр (0)
Share
Толуқ бәт