Yawropada "Barin weqesi" ning 29 yilliqi xatirilendi

Ixtiyariy muxbirimiz ekrem
2019-04-05
Share
Barin-Inqilawi-29-Girmaniye-01.jpg Barin inqilabining 29 yilliqini xatirilesh munasiwiti bilen myunxénda ötküzülgen namayishtin bir körünüsh. 2019-Yili 5-aprél. Myunxén, gérmaniye.
RFA/Ekrem

"5-Aprél barin weqesi" ning 29 yilliqi munasiwiti bilen yawropadiki bir qisim döletlerdiki Uyghurlar namayish ötküzüsh, barin shéhitlirining rohigha atap "Qur'an" tilawet qilish qatarliq pa'aliyetlerni élip bardi we bir qisim teshkilatlar 6-aprél pa'aliyet ötküzüsh hazirliqida bolmaqta.

Her yilqigha oxshashla 5-aprél küni gérmaniyening myunxén shehiride "Barin weqesi" ning 29 yilliqini xatirilesh yüzisidin namayish élip bérildi. Yawropa sherqiy türkistan birliki teripidin uyushturulghan bu namayishqa ishtirak qilghan d u q ning mu'awin re'isi perhat muhemmidi ependining bildürüshiche, yawropadiki xitaygha qarshi tunji namayish "Barin weqesi" seweblik élip bérilghan iken. Bu türdiki namayishlar 29 yildin buyan dawam qilip kelmekte iken. U sözide bügünki bu namayishta barin qirghinchiliqini tonutush bilen xitayning Uyghur diyarida nöwette yürgüzüwatqan jaza lagérlirining mahiyitini pash qilish birleshtürülgenlikini eskertti.
5-Aprél küni norwégiyedimu "Barin weqesi" ning 29 yilliqi xatirilesh pa'aliyiti bolup ötken. "Norwégiye Uyghur komitéti" ning re'isi bextiyar ependining bildürüshiche, bu pa'aliyet shéhitlarni eslesh we ularning rohigha "Qur'an" tilawet qilish usulida élip bérilghan. Pa'aliyetni "Norwégiye Uyghur islam medeniyet merkizi" uyushturghan.

Gollandiyede pa'aliyet élip bériwatqan "Yawropa sherqiy türkistan ma'arip jem'iyiti" ning rehberliridin abduraxman hajimning bildürüshiche, mezkur teshkilat "Barin weqesi" ning 29 yilliqi munasiwiti bilen 6-aprél yermenke ötküzüshning hazirliqini qilghan. 

6-Aprél küni shiwétsiyede pa'aliyet élip bériwatqan shiwétsiye Uyghur ma'arip uyushmisimu "Barin weqesi" ning 29 yilliqi munasiwiti bilen pa'aliyet élip baridiken. Mezkur teshkilatning rehberliridin abdullah kökyar ependi bu heqte bizni bezi uchurlar bilen teminlidi.

Dunya Uyghur qurultiyi 3-aprél küni 1990-yili aqtu nahiyisining barin yézisida yüz bergen "5-Aprél barin weqesi" ning 29 yilliqi munasiwiti bilen élan qilghan axbaratida "Barin inqilabi wetinimiz sherqiy türkistanda xitay mustebitlirining fashistik hökümranliqini aghdurup tashlap sherqiy türkistan xelqining erkinliki, musteqilliqini qolgha keltürüsh ghayisi bilen otturigha chiqqan shanliq bir inqilab idi" dégen jümlini qollan'ghan. Bayanatta yene "Barin inqilabi yéqinqi zaman tariximizdiki milliy kürishimizning ilham buliqi, Uyghur xelqi bu shanliq küresh dastanini ebediy iptixarlinish tuyghusi ichide yad étidu we zeydin yüsüp bashchiliqidiki eziz shéhitlirimizning küresh iradisige sadiqliq bilen warisliq qilidu!" dégen ibarilerge orun bergen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet