Б д т кишилик һоқуқ алий комиссари лагерларни чәклимисиз зиярәт қилишни тәләп қилди

Мухбиримиз җүмә
2019-06-14
Елхәт
Пикир
Share
Принт
Б д т кишилик һоқуқ алий комиссари мешел бачелот ханим кишилик һоқуқ кеңишиниң йиғинида сөзлимәктә. 2019-Йили 13-июн, җәнвә.
Б д т кишилик һоқуқ алий комиссари мешел бачелот ханим кишилик һоқуқ кеңишиниң йиғинида сөзлимәктә. 2019-Йили 13-июн, җәнвә.
REUTERS

Б д т кишилик һоқуқ алий комиссари мешел бачелот хитай даирилиридин лагерларни чәклимисиз зиярәт қилишни тәләп қилғанлиқини билдүрди.

Бу сөзләрни мешел бачелотниң ишханиси радийомизниң бу һәқтә сориған соаллириға язма шәкилдә йоллиған җавабида ейтти.

Мешел бачелотниң таратқу вә ахбарат ишханисиниң хадими мурта һуртадо җавабида мунуларни деди: «алий комиссар хитайни зиярәт қилишқа тәклип қилинди. Һазир биз хитай һөкүмити билән чәклимисиз зиярәт қилиш мәсилисини муназирә қиливатимиз.»

13-Июн хитайниң б д т да турушлуқ баш әлчиси чен шү җәнвәдә мухбирларни күтүвелип, б д т кишилик һоқуқ алий комиссари мешел бачелотниң аталмиш «қайта тәрбийәләш мәркәзлири» ни өз көзи билән көрүп кетишини үмид қилидиғанлиқини билдүргәниди.

Радийомизға йолланған җавабта йәнә б д т кишилик һоқуқ алий комиссариниң хитайниң б д т да турушлуқ баш әлчиси билән өткән һәптә көрүшкәнлики дәлилләнгән.

Б д т ниң мунасивәтлик идарилири өткән йили хитайниң уйғур районида аталмиш «қайта тәрбийәләш мәркәзлири» намида 1 милйондин артуқ уйғурни лагерларға қалмиғанлиқини әйиблигән.

Хитай һөкүмити илгири б д т әмәлдарлириниң уйғур елидә мислисиз дәриҗидә кеңәйтилгән лагерларни чәклимисиз тәкшүрүш тәлипини изчил һалда рәт қилип келиватқан иди.

Б д т кишилик һоқуқ алий комиссариниң бу нөвәт қандақ шәртләр билән хитайға тәклип қилинғанлиқи һәмдә униңға лагерларни чәклимисиз тәкшүрүш рухсити берилидиған яки берилмәйдиғанлиқи һазирчә намәлум.

Һалбуки, хитайниң б д т кишилик һоқуқ алий комиссарини уйғур райониға тәклип қилиши, америкиниң лагер мәсилисидә хитайға қаратқан әйибләшлири күчәйгән, лагерларға қамалғанлар саниниң 2 милйондин 3 милйонғичә икәнлики қәйт қилинивалған мәзгилдә оттуриға чиқти.

Пикирләр (0)
Share
Толуқ бәт