Америкадики бостон шәһәрлик һөкүмәт алдида шәрқий түркистан байриқи чиқирилди

Мухбиримиз меһрибан
2020-11-12
Share
jumhuriyet-bayraq-bostun.jpg Шәрқий түркистанниң икки җумһурийитини хатириләш мунасивити билән америка массачустес штатиниң мәркизи бостунда өткүзүлгән "шәрқий түркистан байриқи" ни чиқириш мурасимида хатирә сүрәт. 2020-Йили 12-нояби.
Photo: RFA

2020-Йили 12-ноябир күни 20-әсир уйғур тарихида қурулған икки қетимлиқ шәрқий түркистан җумһурийитиниң 87 йиллиқи вә 76 йиллиқ йиллиқ хатирә күнидур. Бу мунасивәт билән америкадики уйғур тәшкилатлири вә паалийәтчилириниң америкадики мунасивәтлик һөкүмәт органлириға сунған илтимаслири тәстиқлинип, нйо-йорктики бирләшкән дөләтләр тәшкилатиниң бинаси алдида, америка пайтәхти вашингитон шәһридики хитай әлчиханиси алдида вә бостон шәһәрлик һөкүмәт бинаси алдида шәрқий түркистанниң ай-юлтузлуқ көк байриқи чиқирилди.

Америка массачустес шитатиниң мәркизи бостунда чиқирилған шәрқий түркистанниң ай-юлтузлуқ көк байриқи бостон шәһәрлик һөкүмәтниң тәстиқлиши билән шәһәрлик һөкүмәт бәлгилигән хадимлар тәрипидин 12-ноябир чүштин кейин саәт 1:30 да чиқирилған.

Мәлум болушичә бу 2019-йили 12-ноябир күни бостон шәһиридә тунҗи қетим шәрқий түркистанниң ай-юлтузлуқ көк байриқини чиқириш мурасимидин кейин, бу шәһәрдә иккинчи қетим шәрқий түркистан байриқиниң чиқирилиши икән.

Бостондики массачустес техник университетиниң тәтқиқатчиси уйғур алимә майсәм мутәллипова ханим өз нөвитидә йәнә 2019-йили қурулған "бостон уйғур җәмийити" ниң башлиқи. Майсәм ханим 12-ноябир күни байрақ чиқирилған нәқ мәйдандин радийомиз зияритини қобул қилди.

Майсәм ханим харворд университетида оқуватқан мунәввәр абдулла билән бирликтә бундин бир йерим ай илгирила бостон шәһәрлик һөкүмәт ишханисиға шәрқий түркистанниң ай-юлтузлуқ көк байриқини бостон шәһәрлик һөкүмәт бинаси алдида чиқириш илтимасини йоллиған болсиму, әмма бостон шәһәрлик һөкүмәтниң рухсәт хетини 10-ноябир тапшурувалған икән.

У 12-ноябир күни чүштин кейин саәт 1:30 да бостон шәһәрлик һөкүмәт бәлгилигән икки нәпәр хадимниң улар тапшуруп бәргән шәрқий түркистанниң ай-юлтузлуқ көк байриқини хадиға чиқарғанлиқини билдүрди.

Майсәм ханим йәнә өзи билән бирликтә байрақ чиқириш мурасимиға қатнашқан уйғурларниң шу таптики һаяҗанлиқ кәйпиятини баян қилди.

У сөзидә бостон шәһәрлик һөкүмәтниң тәстиқи билән шәрқий түркистанниң ай-юлтузлуқ көк байриқиниң бостон шәһәрлик һөкүмәт бинаси алдидики хадида америка дөләт байриқи, масачустис шитатиниң шитат байриқи билән бирликтә 24 саәт җәвлан қилидиғанлиқини билдүрди.

Майсәм ханим буниңдин 200 нәччә йил илгири американиң әнгилийәгә қарши елип барған мустәқиллиқ урушиниң от пилтиси болған "бостондики чай төкүш вәқәси" йүз бәргән бостон шәһридә, шәрқий түркистанниң ай-юлтузлуқ көк байриқиниң җәвлан қилиши уйғурлар үчүн тарихий әһмийәтлик бир күн, дәп тәриплиди.

12-Ноябир күни америкадин башқа йәнә канада, австралийә, германийә, түркийә, японийә, шиветсийә, норвегийә, голландийә қатарлиқ дөләтләрдики уйғурларму һәр хил паалийәтләрни өткүзүп, җумһурийәт байримини хатирилигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт