Бүйүк бирлик партийәсиниң яшлар қурултийида уйғур мәсилиси аңлитилди

Ихтиярий мухбиримиз әркин тарим
2021-11-30
Share
Бүйүк бирлик партийәсиниң яшлар қурултийида уйғур мәсилиси аңлитилди Бүйүк бирлик партийәси яшлар қурултийида "ирқий қирғинчилиқ тохтитилсун" темисида имза топлаш паалийитидин көрүнүш. 2021-Йили 28-ноябир, әнқәрә, түркийә.
RFA/Erkin Tarim

28-Ноябир күни әнқәрәдә өткүзүлгән бүйүк бирлик партийәси яшлар қурултийиға түркийәниң 81 вилайитидин зор сандики яш вәкилләр қатнашти. Йиғинға уйғурларға вакалитән түркийәниң коня вилайитидин кәлгән хитайниң уйғурларға қаратқан қирғинчилиқ сияситини түрк хәлқигә аңлитиш мәқсити билән узундин буян түркийәниң һәрқайси шәһәр, вилайәтлиригә биваситә берип, тәшвиқат паалийитини қанат яйдуруватқан уйғур яшлириму иштирак қилди. Бүйүк бирлик партийәси бурундин тартип уйғур мәсилисигә көңүл бөлүп келиватқан сиясий партийә болуп, бу қурултайдиму алаһидә орун берилди. Гүлдүрас алқиш садаси ичидә башланған мурасимда алди билән бүйүк бирлик партийәси рәиси мустафа дәстичи әпәнди уйғурларниң һазирқи еғир вәзийитини "ирқий қирғинчилиқ" дәп атиди. У, мундақ деди: "шәрқий түркистанлиқлар бир әсирдин буян мустәқиллиқ көрүши елип бармақта. Улар бүгүнки күндә еғир ирқий қирғинчилиқ билән ассимилятсийәгә учримақта. Хоҗанияз һаҗи вә әйса йүсүп алиптекин әпәндиләр батурларчә елип барған көрәшни бүгүнләргә елип кәлгән әркинлик вә мустәқиллиқ көрүшини елип бериватқан шәрқий түркистанлиқ қериндашлиримизниң һәқлиқ дәвасини қоллап қуввәтләйдиғанлиқимизни, һәр даим уларниң йенида болидиғанлиқимизни йәнә бир қетим тәкитлимәкчимән".

Бүйүк бирлик партийәсиниң яшлар қурултийида қурултай әһлигә бүйүк бирлик партийәсиниң түрк вә мусулман дуняси сиясити аңлитилған һөҗҗәтлик филимлар көрситилгәндин сирт, түркийәдики даңлиқ сәнәтчиләр консерт бәргән. Бирқанчә миң киши қатнашқан йиғинда уйғурлар қоллирида көк байрақни ләпилдитип, уйғурларни тонуштурғандин сирт, "ирқий қирғинчилиқ тохтитилсун" темисида имза йиғиш паалийити өткүзгән.

Бүйүк бирлик партийәси яшлар қурултийиға иштирак қилған уйғур яшлири ай юлтузлуқ көк байрақлирини ләпилдәтмәктә. 2021-Йили 28-ноябир, әнқәрә, түркийә.
Бүйүк бирлик партийәси яшлар қурултийиға иштирак қилған уйғур яшлири ай юлтузлуқ көк байрақлирини ләпилдәтмәктә. 2021-Йили 28-ноябир, әнқәрә, түркийә.

Мәркизи истанбулда турушлуқ султан сатуқ буғрахан вәхписиниң коня шөбисиниң рәиси абләт удун әпәнди йиғинниң ечилиш мурасимида бүйүк бирлик партийәсиниң рәиси мустафа дәстичи әпәнди билән яшларға мәсул рәиси самәт бағчи әпәндиниң уйғурларниң һазирқи еғир вәзийити һәққидә тохталғанлиқини, буниңдин интайин хурсән болғанлиқини оттуриға қойди.

Абләт удун әпәнди қурултайда уйғурларниң икки қолида көк байрақни ләпилдитип түркийәниң 81 вилайитидин кәлгән яшларға шәрқий түркистан мәсилилириниң аңлитилғанлиқини баян қилди.

Түркийәдә милләтпәрвәрлик идийәсини илгири сүридиған бүйүк бирлик партийәси милләтчи һәрикәт партийәсидин айрилип чиққан мухсин язиҗиоғлу башчилиқидики 5 нәпәр парламент әзаси тәрипидин 1993-йили 1-айниң 24-күни қурулған партийәдур. Мәзкур партийәниң қурғучиси муһсин язиҗиоғлу 2009-йили айропилан қазасида вапат болғаниди. Уйғурлар қурултайға кәлгән яшлар билән бирликтә алди билән мәрһумниң қәбрисини зиярәт қилған. Йиғин залиғичә қоллирида көк байрақ көтүргән һалда йүрүп уйғурларни тонуштурған. Абләт удун әпәнди бу һәқтә мәлумат бәрди.

Лагер тутқунлири йеқинлиридин мәдинә назими ханим башчилиқидики бир гуруппа уйғурниң қурултай җәрянида "хитай лагерни тақивәтсун" темисида имза йиғиш паалийити елип барғанлиқини, бу имзаларни бирләшкән дөләтләргә тапшуруп беридиғанлиқини баян қилди.

Бүйүк бирлик партийәси қурулған күндин башлап, түркий милләтләрниң мәсилилиригә, болупму уйғур мәсилисигә алаһидә көңүл бөлүп кәлмәктә. Җаза лагерлири мәсилиси чиққандин кейинму түркийә парламентида вә өз партийәсидә көп қетим мухбирларни күтүвелиш йиғини чақирип, уйғурларниң һазирқи еғир вәзийитини оттуриға қоюп кәлмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт