Чимәнгүл авут "2021-йиллиқ хәлқара җәңгивар шаир мукапати" ға еришти

Ихтиярий мухбиримиз азиғ
2021-06-28
Share
chimengul_awut.jpg Атақлиқ шаирә чимәнгүл авут.
Social Media

Йеқинда алтә дөләтни өз ичигә алған фирансуз тиллиқ шаирлар уюшмиси (Prix du poètes résistants) тонулған уйғур шаири чимәнгүл авутқа "2021-йиллиқ хәлқара җәңгивар шаирлар мукапати" беришни қарар қилған. Мәзкур орган явропа уйғур институти билән алақә орнитип өзлиригә фирансуз тилида нәшр қилинған әсирлири мәвҗут уйғур шаирлирини намзат көрситишни тәләп қилған.

Бундин бурун явропа уйғур институтиниң "уйғурға нәзәр" журнилида гүлхумар хативаҗи тәрипидин чимәнгүл авутниң шеирлири тонуштурулған бир мақалә елан қилинған. Униңдин башқа доктор дилнур рәйһан фирансийә қәләмкәшләр җәмийитиниң тәлипи бойичә фирансийә қәләмкәшләр җәмийитиниң пәсиллик журнили "учурнамә" гә чимәнгүл авутниң бир қисим шеирлирини тәрҗимә қилған болуп, шаир чимәнгүл авут әсирлири фирансузчиға тәрҗимә қилинған аз сандики уйғур шаирлириниң бири һесаблинидикән.

Биз мақалисидә шаир чимәнгүл авутни вә шеирлирини тонуштурған гүлхумар хативаҗини зиярәт қилдуқ. Гүлхумар ханим бу һәқтики ойлирини биз билән ортақлашти.

Франсийәдики тонулған уйғур зиялийси дилнур рәйһан ханим шаир чимәнгүл авутниң мәзкур мукапатқа еришиш җәряни һәққидә зияритимизни қобул қилип тәпсилий мәлумат бәрди. явропа уйғур институти чимәнгүл аувтқа вакалитән мукапатни тапшуруп алидиған болуп, дилнур рәйһан ханим мукапат һәққидә тохтилип: "чимәнгүл авут гәрчә бу мукапатни қобул қилалмисиму, йәнила буни чимәнгүл авут вә вәтән сиртидики уйғурлар үчүн чоң бир илһам дәп ойлаймән," деди.

Хитай һөкүмитиниң уйғурларға йүргүзүватқан ирқи қирғинчилиқ сиясити сәвәблик йүзләрчә уйғур зиялийси йиғивелиш лагерлирида вә түрмиләрдә тутуп турулуватқан болуп, бәзилириниң ақивити һазирғичә мәлум әмәс икән. Көзәткүчиләрниң қаришичә, хитай һөкүмитиниң уйғур елидики қирғинчилиқ сиясити сәвәблик уйғур мәдәнийәт-сәнитини еғир һалсиримақта икән.

Шиветсийәдә туруватқан уйғур зиялийси шаир абдушүкүр муһәммәт әпәндим зияритимизни қобул қилип, чимәнгүл авутниң әдәбий иҗадийити вә уйғур әдәбиятидики орни һәққидә тәпсилий мәлумат бәрди.

Чимәнгүл авут қәшқәр уйғур нәшриятиниң тәһрири болуп, 2018-йили 7-айда атақлиқ язғучи халидә исраилниң "алтун кәш" намлиқ романини тәһрирлигән. 2018-Йили 7-айда чимәнгүл авут бу китаб сәвәблик мәзкур нәшриятниң 13 нәпәр хадими билән биллә тутқун қилинған. Һазирғичә чимәнгүл авутниң ақивити һәққидә ениқ бир мәлумат йоқ икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт