Kanada bash ministiri diniy erkinlik ishxanisining échilish murasimida Uyghurlarni tilgha aldi

Yéqinda, kanadaning toronto shehiride échilghan kanada tashqi ishlar ministirliqi qarmiqidiki diniy erkinlik ishxanisining échilish murasimida söz qilghan kanada bash ministiri Stewén xarpér, Xitayda yürgüzülüwatqan diniy adaletsizlikler heqqide toxtalghanda, Uyghur musulmanliriningmu xitay hökümiti yürgüzüwatqan diniy zulumlarning qurbani boluwatqanliqini alahide tilgha aldi.

Kanada tashqi ishlar ministirliqi qarmiqida yéngidin échilghan bu diniy erkinlik ishxanisining meqsiti iraq, misir, pakistan, iran qatarliq diniy étiqad we ishinish erkinliki adaletsizlikke uchrawatqan döletlerde, diniy étiqad we ishinish erkinlikining emelge éshishi üchün xizmet qilish ikenlikini bildürgen bash ministir stewén xarpér, dunyadiki diniy zulum éghir boluwatqan döletler heqqide örnekler bérip, nuqtiliq halda xitayni tilgha élip ötti.

U mundaq dédi: “Xitayda, xitay hökümiti belgilep bergen sorunlardin bashqa sorunlarda ibadet qilghan we yer astida öz diniy étiqadlirini teshwiq qilghan kishiler we ularning bashchilirini qolgha aldi we türmilerge tashlidi.”
Stewén xarpér xitay heqqide örnekler bergende Uyghurlarnimu alahide tilgha élip mundaq dédi: “Xitay hökümiti Uyghur musulmanliri, tibet buddistliri shundaqla falunggung meshqchilirini nuqtiliq halda tutqun qildi we türmilerge tashlidi. Kanada diniy erkinlik ishxanisi dunyaning herqaysi jayliridiki diniy étiqadi we ishinish erkinliki zulumgha uchrighan kishilerge yardem qilish üchün xizmet qilidu. Bu kanada tashqi siyasitining muhim terkibi qismi. Diniy étiqad we ishinish erkinliki tosqunluqqa uchrawatqan yuqiriqidek döletlerde diniy étiqad erkinlikini emelge ashurush bizning meqsitimiz we mes'uliyitimiz.”

Torontoda qurulghan kanada diniy erkinlik ishxanisining échilish murasimida, muxbirlarning so'allirigha jawab bergen stewén xarpér muxbirning “Kanada bilen xitay otturisida soda we tijari munasiwetler barghanche küchiyiwatqan ehwal astida, soda bilen kishilik hoquq, diniy étiqad we ishinish erkinlikining munasiwitini qandaq bir terep qilish kérek” dégen so'aligha jawab bérip mundaq dédi:
“Kanada tashqi siyasitining 3 muhim terkibi qismi bar. Ular, démokratiye we kanadaning qimmet qarishi, kanadaning we dunyaning tinchliqi we bixeterliki shundaqla soda-tijaret.”

Bu programmining tepsilatini awaz ulinishidin anglighaysiz.