Istanbuldiki Uyghurlar iptar ziyapitide jem boldi

Mubarek ramzan éyi munasiwiti bilen 2013-yili 25-iyul peyshenbe küni merkizi istanbulgha jaylashqan sherqiy türkistan ma'arip we hemkarliq jem'iyitining uyushturushida zeytinburnu sheherlik hökümet binasining ichidiki meydanda istanbuldiki Uyghurlar üchün keng-kölemlik iptar ziyapiti bérildi.

Iptar ziyapitige istanbulda yashawatqan Uyghurlardin er-ayal bolup, 1000 gha yéqin kishi qatnashti. Sherqiy türkistan ma'arip we hemkarliq jem'iyiti teripidin uyushturulghan bu iptar ziyapitige türkiye parlaméntining sabiq parlamént ezasi, proféssor jalal erbay, zeytinburnu mu'awin sheher bashliqi ilyas saka we insan we medeniyet herikiti fondining mes'ulliridin doktor ikram sultan qatarliq muhim shexslermu qatnashti.

Iptar waqti yéqinlap kelgende, sabiq parlamént ezasi proféssor jalal erbay du'a qildi. Iptargha kelgen pütün kishiler jalal erbaygha egiship du'agha qol kötürdi we Uyghurlarning birlik-barawerliki, hörlük, azadliqi üchün du'a qildi.

Yighin ehli du'adin kiyin her xil yémeklikler bilen iptar qildi. Kiyin jem'iyetning re'isi hidayetulla oghuzxan qisqiche söz qilip, Uyghurlarning iptar ziyapetke a'ile ezaliri we baliliri bilen qedem teshrip qilghanliqi üchün teshekkür éytidighanliqini bildürdi.

Biz bu pa'aliyet toghrisida pikir-qarashlirini élish üchün sherqiy türkistan ma'arip we hemkarliq jem'iyitining ijtima'iy ishlar mes'uli abdulkerim kuchar we möminjan bilen söhbet élip barduq.

Abdulkerim kuchar, topliship iptar qilishning ehmiyiti toghrisida toxtaldi we roza-ramizanda jem bolup iptar qilishning, birlik-barawerlik, dostluq we qérindashliqni kücheytish bilen birge, öz yurtidin ayrilip ghérip-musapir bolup yashawatqan Uyghurlarning bir yerge jem bolidighanliqi bu arqiliq, azraq bolsimu weten hesritini untup xushal ötüshke türtke bolidighanliqini ipadilidi.