Кучада семонтта қатурулған қәвәтлик заратгаһлиқ қурулуватқанлиқи ашкариланди

Мухбиримиз шөһрәт һошур
2018-08-09
Елхәт
Пикир
Share
Принт
Хитайниң җәсәт көйдүрүш җәрянидин көрүнүш.
Хитайниң җәсәт көйдүрүш җәрянидин көрүнүш.
baike.baidu.com

Мухбиримизниң куча наһийисидики лагерлар тоғрилиқ елип барған телефон зиярәтлири давамида ханиқатам йезисида үстигә тахтай йепилған, асти семонт билән қатурулған 2-3 қәвәтлик зәрәтгаһлиқ қурулуватқанлиқи ашкариланди.

Мәлум болушичә, хитай хәлқ ишлири министирлиқи 2009‏-йили һөҗҗәт чүшүрүп, мәмликәт бойичә дәпнә ислаһатини йолға қоюшни чақириқ қилған иди. Дәпнә ислаһати лайиһисидә җәсәтни әнәниви усулда, йәни җәсәт сандуқиға селип йәргә көмүшниң орниға җәсәтни көйдүрүветиш тәшәббус қилинған иди. Мәзкур һөҗҗәттә йәнә бу ислаһатни дәрһал иҗра қилмаслиқ, бәлки қәдәмму-қәдәм иҗра қилиш, аввал партийә әзаси болған бир қисим өлгән кишиләрни көндүрүш тәләп қилинған иди. Буниң нәтиҗисидә 2014-йилдин башлап, дәпнә ислаһати хитайниң йүннән вә җяңши қатарлиқ өлкилиридә рәсмий иҗра қилинишқа башлиған. Бу йил үрүмчидә катта җәсәт көйдүрүш орни тәсис қилинидиғанлиқи елан қилинип, мәзкур ислаһатниң уйғур аптоном районидиму тез вә җиддий йолға қоюлидиғанлиқидин шәпә берилгән иди. 

Биз кучаға қарита елип барған телефон зиярәтлиримиз давамида җәсәт бир тәрәп қилиш орунлири һәққидиму мәлумат соридуқ. Алақидар сақчи хадими кучаниң ханиқатам йезисиниң үстүн сайериқ, төвәндә сайериқ вә базар кәнтлиридә җәсәт бир тәрәп қилишқа аит қурулушларниң елип бериливатқанлиқини баян қилди. 
Куча наһийисидики сақчи сақчи хадими селиниватқан қәвәтлик заратгаһлиқниң үстидә тахтай барлиқи, астиға семонт қатуруливатқанлиқини баян қилди. Әмма у бу заратгаһлиқниң семонт вә тахтайдин қилинидиғанлиқи вә қәвәтлик қилинидиғанлиқи һәққидә мәлумат берәлмиди. 
Хитай торлиридики хәвәрләрдин мәлум болушичә, хитайниң җяңши өлкиси дәпнә ислаһатини 2020‏-йилиға қәдәр 100 пирсәнт әмәлийләштүрүп болушни буйруған. Буйруқта коллектип зәрәтгаһлиқ бәрпа қилиш, җәсәтләр көйдүрүлүш вә бир кишилик җәсәт күли үчүн 1 квадрат метирдин ошуқ йәр айримаслиқ шәрт қилинған. 

Кучадики сақчи хадими ханиқатам базар кәнтидә қурулуватқан бу қәвәтлик заратгаһлиқниң көлиминиң бирқанчә мо икәнликини баян қилди. Әмма бу заратгаһлиқниң қанчилик киши үчүн пиланланғанлиқи, һәр бир киши үчүн қанчилик орун айрилғанлиқи һәққидә мәлумат берәлмиди. 

Биз илгири хотәнгә қарита елип барған телефон зиярәтлиримиз давамида бу җайларда бултурдин башлап дәпнә мурасими орни қурулуватқанлиқи, бу орунларниң асаслиқи мейит узитиш ишлириға назарәт вә йетәкчилик қилидиғанлиқи мәлум болған иди. Куча ханиқатамда қурулған бу қәвәтлик зәрәтгаһлиқ, йәни семонт йәрлик уйғур районида қурулуватқан дәпнә мурасими мулазимәт орунлириниң вәзиписиниң хитайниң қилған дәпнә ислаһати лайиһисини уйғур районида әйнән иҗра қилиш икәнликидин ишарәт бәрмәктә.

Пикирләр (0)
Share
Толуқ бәт