Лүкчүн вәқәсидики һуҗумчи вә һуҗумға учриғучилардин бир қисминиң кимлик вә иш-излири ашкариланди

Пичан наһийиси лүкчүн базирида йүз бәргән тоқунуштин бир көрүнүш. 2013-Йили 26-июн.

26-Июн күни пичан лүкчүндә йүз бәргән сақчихана қатарлиқ хитай дөләт аппаратлириға от қоюп һуҗум қилиш вәқәсидә һуҗум қилған вә һуҗумға учриғучиларниң көпинчисиниң ениқ кимликлири вә иш-излири техичила йошурун тутулмақта.

Хитай даирилири һуҗумчилардин әхмәтнияз сидиқ билән ибраһим елидин башқилириниң кимликлирини елан қилмиди. Мухбиримиз бу һәқтә йәрлик даириләрдин әһвал сүрүштә қилиш арқилиқ, һуҗумчилардин ярилинип әсир чүшкән абдулла исрапил вә һуҗумға учриғучилардин 3 нәпәр сақчи хадиминиң кимликлирини ениқлап чиқти. Мәлум болушичә әсир абдулла исрапил бирқанчә йилдин буян үрүмчидә шопурлуқ қиливатқан болуп, вәқәдин 4 күн бурун юртиға қайтип кәлгән вә сәпдашлири билән бирликтә вәқәдә рол алған.

Мухбир: бу лүкчүнниң муқам кәнт аһалиләр комитетиму?
Хадим: шундақ, партийә ячейкиси.

Мухбир: бу қетимқи вәқәдә силәрниң кәнттин өлгән-яриланғанлар барму-йоқму?
Хадим: бар.

Мухбир: қанчә нәпәр?
Хадим: үч.

Мухбир: улар кимләр?
Хадим: сақчи адил аблиз, 27 яш; ярдәмчи сақчи йәһя исрапил, 21 яш; алаһидә сақчи җаппар осман, 30 яш; һәммиси муқам кәнтидин.

Мухбир: алаһидә сақчи қандақ өлтүрүлүпту?
Хадим: боғузлап.

Мухбир: башқилиричу?
Хадим: тохтаң, секретарға берәй....

Мухбир: сиз муқам кәнт партийә ячейка секретари алимҗанму?
Хадим: шундақ, алимҗан нур.

Мухбир: һуҗум қилғучиларниң арисида силиниң кәнттин қетилғанлар барму?
Секретар: бири бар.

Мухбир: ким? немә иш қилидиған бала?
Секретар: абдулла исрапил, бирқанчә йилдин буян үрүмчидә шопурлуқ қиливатқан иди; сақчилар билән берип ата-анисидин сүрүштә қилсақ, 22-чесла(вәқәдин 4 күн бурун) өйигә кәлгән икән. Вәқәдә қолиға оқ тегип ярилинипту, һазир дохтурханида,сақчиларниң назарити астида.

Мухбир: абдулла исрапилниң бурун диққитиңларни тартқан иш-һәрикәтлири болғанму?
Секретар: сақал қойидиған болувалған, сақилини чүшүргүзүвәткән идуқ.

Мухбир: өлгән сақчиларниң өлүм мурасимлириға қатнаштиңизму? аилилириниң инкаси қандақ?
Секретар: қатнаштим һәм аилилиригә идийиви хизмәт ишлидуқ. Уларға һөкүмәтниң бу ишни яхши бир тәрәп қилидиғанлиқини вә уларни рази қилидиғанлиқини билдүрдуқ. (Өлгүчиләр аилиси тәрәптин) башқа бир мәсилә чиқмиди.

Хитайчә тәңритағ ториниң 3-июл йәни чаршәнбә күнидики бир хәвиридин ашкарилинишичә, лүкчүндики вәқәдә хитай тәрәптә туруп өлгәнләрдин бири дәм елишқа чиққан оқутқучи аблимиттур. У шу күни чениқиш үчүн сиртқа чиққан болуп, у һуҗумға учраватқан бир хитайға һесдашлиқ қилип қоғдашқа урунғанлиқи үчүн пидаийларниң һуҗумиға учриған вә дохтурханида җан үзгән. Йәнә шу хәвәрдә баян қилинишичә, һуҗумға учрап өлгән сақчилардин бири 29 яшлиқ абдусалам һәбибулла болуп, у хизмәттики актипчанлиқи сәвәблик, вәқә йүз бериштин бир күн бурун, хитай компартийисигә әзалиққа қобул қилинған. Хәвәрдин ашкарилинишичә, пидаийлар сақчиханиға һуҗум қилған мәзгилидә сақчиханида 9 нәпәр хадим нөвәттә туруватқан болуп, вәқәдә йеник яриланған сақчихана башлиқи или чаңчиң қорқуп кетип иккинчи қәвәттики ишханисиниң деризидин сәкрәп қечип кәткән. У нөвәттә пичандики дохтурханида даваланмақта.