Xotende meschit chéqish dolqunining yene dawam qiliwatqanliqi delillendi

Muxbirimiz shöhret hoshur
2018-08-16
Élxet
Pikir
Share
Print
Chiqiliwatqan meschitlerge échinip qarawatqan boway.
Chiqiliwatqan meschitlerge échinip qarawatqan boway.
Social Media

Türkiyediki "Uyghur xewer we tetqiqat merkizi" türkiyege yéngi kelgen xotenlik bir muhajirning bayanlirigha asasen xotende meschit chéqish dolqunining yene dawam qiliwatqanliqi, buning netijiside xotendiki beytulla we beytulmemur meschiti qatarliq 10 nechche qedimiy meschitning chéqiwétilgenlikini xewer qildi. Muxbirimizning bügün xoten'ge qarita élip barghan téléfon ziyaretliri dawamida xotende meschit chéqish dolqunining yene dawam qiliwatqanliqi delillendi. Alaqidar saqchi xadimliri xotenning yéngi'ériq yézisidila 5 meschitning chéqilip ornigha saqchixana, gilemxana we tikküchilik karxanisi séliniwatqanliqini ashkarilidi.

"Uyghur xewer we tetqiqat merkizi" ning mezkur xewiride xoten sheher ichi we etrapida chéqiwétilgen qedimiy meschitlerdin awral meschiti, nurluq jamesi, héytgah meschiti, beytullah meschiti, beytulmemur meschiti, jujan derwaza meschiti we atbaziri meschiti qatarliq 13 meschitning nami tilgha élin'ghan. Xewerdin melum bolushiche, xotendiki bu meschitlerning chéqilishi, Uyghur rayonida yighiwélish lagérlirigha adem toplash bashlan'ghan ötken yili 3‏-aydin bashlan'ghan. Meschitlerning chéqilishi lagérlargha adem toplash bilen mas qedemde élip bérilghan.

Biz xotenning nawagh, ghojambagh qatarliq saqchixanilirigha téléfon qilghinimizda saqchi xadimliri xotende dawam qiliwatqan meschit chéqish herikiti heqqide gep qilishqa unimidi. Xotenning yéngi'ériq saqchixana xadimi meschit chéqish herikitining 4-5 aydin béri jiddiy shekilde dawam qiliwatqanliqini ashkarilidi. Melum bolushiche, chéqilghanliri sharqiratma meschit, jigdilik meschit qatarliq 5 orundiki meschit bolup, bularning ornigha saqchixana, gilemxana we tikküchilik karxanisi qurulmaqtiken.

Ilgiri éniqlashlirimizdin delillinishiche, 2015- we 2016-yilliri qeshqer we xotenlerde meschitlerni ixchamlash nami astida meschit chéqish herikiti keng-kölemde élip bérilghan idi. U chaghlarda herqaysi mehelle meschitliri chéqiwétilip, her bir kentte peqet birdin meschit saqlap qélin'ghan. Bügünki yéngi'ériq saqchi xadimining bayanliridin melum bolushiche, yéqinqi 4-5 ay ichide yéngi'ériqtiki 9 meschittin 5 meschit chéqiwétilip, peqet 4 meschit saqlap qélin'ghan. Matériyallarda körsitilishiche, yéngi'ériq yézisi 9 kenttin teshkillen'gen iken. Buningdin qarighanda, xitay da'iriliri 2015- we 2016-yilliri mehelle meschitlirige atalmish "Ixchamlash" élip barghan bolsa, emdilikte kent meschitlirinimu ixchamlawatqanliqi, netijide her ikki yaki 3 kentke birdin meschit saqlap qalghanliqi melum bolmaqta.

"Uyghur xewer we tetqiqat merkizi" ning xotendiki meschit chéqilish heqqide bergen mezkur xewiride namliri tilgha élin'ghan mezkur meschitlerning köpinchisining birqanche yüz yilliq tarixqa ige ikenliki, ularning "Medeniyet inqilabi" dewride bir qétim chéqiwétilip yaki buzuwétilgenliki, 1980‏-yillargha kelgende qaytidin qurulghan yaki rémont qilin'ghanliqi bayan qilin'ghan. Nöwette da'iriler xoten yéngi'ériqtiki bu besh meschitning ornigha saqchixana we karxana qurush arqiliq bu meschitlerning izinimu qaldurmighan.

Toluq bet