Истанбулда “шәрқий түркистан өлималар бирлики җәмийити” қурулди

Ихтиярий мухбиримиз арслан
2016.01.18
sherqiy-turkistan-olimalar-birliki-1.jpg Охшимиған дөләтләрдин кәлгән 30 дин артуқ уйғур диний алимлар истанбулда шәрқий түркистан өлималар бирлики җәмийитини қуруп чиқиш йиғинида. 2016-Йили 17-январ, түркийә.
RFA/Arslan

1-Айниң 15-күнидин 17-күнигичә дуняниң охшимиған дөләтлиридә дини илим тәһсил қилған вә охшимиған дөләтләрдики бир қисим мәктәп вә яки ислами тәтқиқат мәркәзлиридә хизмәт қиливатқан 30 дин артуқ уйғур диний алим истанбулға җәм болуп йиғин ечип музакирә қилиш нәтиҗисидә “шәрқий түркистан өлималар бирлики җәмийити” ниң рәсмий қурулғанлиқини елан қилди.

“шәрқий түркистан өлималар бирлики җәмийити” ниң ғайә-мәқсәтлири немә? тәшкили аппарати қандақ вә идарә рәһбәрлик һәйәттә қанчә киши бар? хизмәт саһәлири қайси? бу соалларниң җавабиға еришиш үчүн бу җәмийәтниң рәиси болуп сайланған, түркийә мармара университетиниң оқутқучиси доктор атавуллаһ шәһяр вә тәтқиқатчи журналист диний алим сираҗиддин әзизи билән сөһбәт елип бардуқ.

Доктор атавуллаһ шәһяр әпәнди, “шәрқий түркистан өлималар бирликиҗәмийити” ниң ғайә-мәқсәтлири тоғрисида тохтилип мундақ деди: “хәлқимизгә динни тоғра бир шәкилдә аңлитиш, хәлқимизгә мумкин қәдәр әслигә уйғун бир шәкилдә динни йәткүзүш, диний еһтияҗлирини қамдаш үчүн, хәлқимизниң диний бирлики вә итиқадий бирликини сақлап қелиш, диний җәһәттә университет сәвийисидә оқуған яш қериндашларни өз-ара бирләштүрүш, уларниң арисида пикир бирликини сақлаш, йеңидин йетишип чиққан яшларни оттуриға чиқириш шундақла һәр җәһәттә бесимға учраватқан уйғур хәлқини диний җәһәттин болсиму йетәрлик дәриҗидә мәлуматлар билән тәмин қилишни мәқсәт қилимиз.”

Доктор атавуллаһ шәһяр бу җәмийәтниң вә идарә һәйәт рәһбәрлики вә тәшкили аппарати тоғрисида мәлумат бәрди. Шәрқий түркистан өлималар бирлики җәмийити 30 әтрапида мөтивәр өлималарниң әза болуши билән қурулған болуп, доктор атавуллаһ шәһяр рәисликкә, диний җәһәттә истанбул университетида докторлуқ тәтқиқат мақалиси йезиватқан абдухалиқ уйғур баш катиплиққа сайланған. Униңдин башқа йәнә җәмийәтниң идарә һәйәт рәһбәрликигә 11 киши тәйинләнгән.

Биз йәнә бу һәқтә техиму көп мәлуматқа игә болуш үчүн җәмийәтниң идарә һәйәт әзаси тәтқиқатчи журналист сираҗиддин әзизи билән сөһбәт елип бардуқ.
Сираҗиддин әзизи әпәнди шәрқий түркистан өлималар бирлики җәмийитини қурулуштики мәқсити тоғрисида тохтилип оз пикрини баян қилди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.