Диний зат әйса қарим рамизанниң хасийити вә уйғурларниң рамизан вәзийити һәққидә пикир баян қилди

Голландийәдә яшаватқан диний зат, сиясий паалийәтчи әйса савут әпәнди бүгүн мухбиримизниң зияритини қобул қилип, рамизан ейиниң хасийити вә роза тутушниң һекмити шундақла уйғур районидики рамизан ейи вәзийити үстидә пикир баян қилди. Рамизан ейиниң мусулманлар үчүн өз ирадисини тавлаш, бирлик-баравәрликни мустәһкәмләш ейи икәнликини әскәрткән әйса савут әпәнди, уйғур райониниң нөвәттики еғир вәзийитидә зулум вә һәқсизлиққа қарита қәлб билән қарши туруш шәклиниң муһимлиқини тәкитлиди.

Әйса савут әпәнди сөзиниң ахирида, вәтән ичидә хитай компартийисигә беқинмайдиған, сап әқидилик диний затларниң ашкара яки йошурун һалда йәнила мәвҗутлуқини, шуңа рамизанда чәклимә яки зораванлиққа йолуққан аһалиләрниң вәзийәткә қандақ муамилә қилиш мәсилисидә әнә шу мустәқил диний затларниң һөкүм вә көрсәтмилиригә әгишиши керәкликини әскәртти.