Uyghurlar mesilisi shwétsiye musulman jem'iyetlirining bu yilliq muhakime munbiridin orun aldi

Shwétsiye parlamént ezasi mehmet qaplan we shwétsiye Uyghur ma'arip uyushmisining re'isi nijat turghun yighin meydanida. 2013-Yili 29-mart, shwétsiye.

Shwétsiyidiki herqaysi partiyilerning munasiwetlik xadimliri yighin körgezme zalidin orun alghan Uyghur teshwiqat bölümini ziyaret qilmaqta. 2013-Yili 29-mart, shwétsiye.

Shwétsiyini asas qilghan skandinawiye döletliridiki musulman jama'etchilikining her yilliq chong yighilishida Uyghurlar islam dunyasining bir parchisi bolush süpiti bilen muhim orun élip kelmekte.

29-Marttin 31-martqiche bolghan ariliqta shwétsiye musulman yashlar teshkilati, shimaliy yawropa islam birliki hemde ibin rushid telim-terbiye merkizi qatarliq üch chong ammiwi teshkilatning uyushturushi bilen bu yilliq shwétsiye musulman jem'iyetlirining birleshme yighilishi stokholmdiki elxö körgezmixanisida daghdughiliq ötküzüldi. Yighilishqa shwétsiye Uyghur ma'arip uyushmisimu alahide teklip bilen qatnashti.

Bu qétimliq zor kölemlik yighilishning küntertipi ikki mezmundin teshkil tapti. Biri körgezme zalida shwétsiyidiki her millet musulmanlirining nechche onlighan ammiwi teshkilatlirining teshwiqat buyumliri körgezme qilindi. Yene biri shimaliy yawropada yashawatqan musulman jama'etchilikining ré'al mesililiri islam dunyasi we dunya weziyitidiki qiziq nuqtilargha baghlan'ghan halda muhakimige qoyuldi.

Shwétsiye Uyghur ma'arip jem'iyitining teshwiqat ornimu körgezme zalidin alahide orun aldi. Buningda Uyghurlarning diniy we milliy medeniyiti, tarixi hemde kimlikini eks ettüridighan buyumlar körgezme qilindi. Rabiye xanimning hayati heqqidiki kitabning shwétche neshrimu körgezmidin alahide orun aldi.

Yighilishning ikkinchi künide islam dunyasidiki éziliwatqan milletler témisida mexsus muhakime élip bérildi. Buningda bangladash, bérma, süriye musulmanliri qatarida Uyghur mesilisimu muhakime munbiridin orun aldi. Shwétsiye Uyghur ma'arip uyushmisining re'isi nijat turghun 5 kishilik muhakime munbirige teklip qilinip yighin ehlining Uyghurlar heqqide sorighan so'allirigha neq meydanda jawab berdi. Biz bu heqte tepsiliy melumat élish üchün shwétsiye Uyghur ma'arip uyushmisidin nijat turghun we abdulla ependiler bilen söhbet élip barduq.

Tepsilatini awaz ulinishtin anglighaysiz.