Уйғур районида исламдики 5 пәрзниң бири - закатниң чәкләнгәнлики ашкариланмақта
2017.06.27

Бүгүн иҗтимаий таратқуларда “чен чүәнгониң рамизан мәзгилидики муқимлиқни қоғдаш йиғинида сөзлигән сөзидин билишкә тегишлик соал-җаваб” мавзулуқ бир өгиниш материялиниң сүрәт копийәси тарқалди. Материялниң “рамизан мәзгилидики алтини қәтий чәкләш қайсилар?” мавзулуқ қисмида закатниңму чәклинидиғанлиқи тилға елинған. Мухбиримиз бүгүн бу һәқтә қәшқәр йеңишәһәрниң япчан базиридики кәнт секретарлиридин мәлумат сориди. Секретарлар закатниң чәкләнгәнликини дәлиллиди. Бәзиләр бу чәкләшниң 2 йилдин бери, бәзиләр болса 5 йилдин бери иҗра қиливатқанлиқини тилға алди.
Иҗтимаий ахбарат васитилиридә тарқалған юқириқи материялдики “6 чәкләш қайсилар?” дегән соалға, район атлап диний паалийәт елип беришни чәкләш, диний вәзиписи йоқларниң тәпсир қилишини чәкләш, етиқадчи амминиң ианә йиғишини чәкләш, закат беришни чәкләш, мәсчитләрдә иптар тамиқи йейишни чәкләш вә хәтмә таравини чәкләш” дәп җаваб берилгән. Биз булардин хәлқараға техи ашкариланмиған-закатниң чәкләнгәнлики һәққидики учурниң тоғра яки хаталиқи һәққидә ениқлаш елип бардуқ. Қәшқәр йеңишәрниң япчан базиридики кәнт секретарлири соаллиримизға очуқ җаваб бәрди.
Диний материялларда баян қилинишичә, исламдики бәш пәрзниң бири болған закат бериш, җәмийәттә иҗтимаий адаләтни шәкилләндүрүш, иқтисадий тәңпуңсизлиқларни бәлгилик дәриҗидә тәңшәш, өз-ара һәмкарлиқ арқилиқ мусулманлар арисида қериндашлиқ меһрини күчләндүрүшни мәқсәт қилған. Көзәткүчиләр, хитай даирилириниң уйғурлар арисида миллий бирликниң күчийип кетишиниң алдини елиш вә вә һакимийәткә қарши һәрикәтләрни иқтисадий мәнбәдин айрип ташлаш үчүн закатни чәклигәнликини илгири сүрүшмәктә.