Д у қ австралийә парламент әзаси, уйғурларниң қоллиғучиси кимбәрли ханимниң вапатидин қайғурди

Ихтиярий мухбиримиз әркин тарим
2022-03-10
Share
Д у қ австралийә парламент әзаси, уйғурларниң қоллиғучиси кимбәрли ханимниң вапатидин қайғурди Уйғурлар австралийә әмгәкчиләр партийәсидин болған парламент әзаси уйғур дәвасиниң қоллиғучиси кимбәрлй китчиң ханим билән. 2022-Йили 10-март.
RFA/Erkin Tarim

Австралийә әмгәкчиләр партийәсидин болған парламент әзаси уйғур дәвасиниң қоллиғучиси кимбәрлй китчиң ханим 3-айниң 10-күнитуюқсиз аләмдин өтти.

Бу мунасивәт билән австралийәдики уйғур аммиви тәшкилатлири, дуня уйғур қурултийи иҗтимаий таратқулар арқилиқ тәзийәнамә елан қилди. Мәзкур баянатларда: “һөрмәтлик кимбәрлй китчиң ханим аләмдин өтти, әмди 52 яшқа қәдәм қойғаниди. Униң вапати шәрқий түркистан дәваси үчүн зор бир йоқитиш болди, аилисигә вә уруқ-туғқанлириға сәвр тиләймиз!” дейилгән.

Австралийә парламентида уйғурларниң авази болған кимбәрлй китчиң ханимниң вапати вә униң уйғур дәвасиға қошқан төһписи тоғрисида техиму тәпсилий мәлумат игиләш үчүн д у қ рәиси долқун әйса әпәнди вә австралийә уйғур җәмийитиниң сабиқ баш катипи, дуня уйғур қурултийи ички ишлар комитети мудири бәхтияр бөрә әпәндиләр билән сөһбәт елип бардуқ.

Долқун әйса әпәнди бу һәқтә мунуларни оттуриға қойди: “австралийәниң парламент әзаси болған кимбәрлй китчиң ханимниң вапат хәвирини аңлап бәкму әпсусландуқ. Өзи 52 яшқа киргән, қабилийәтлик яш сиясәтчи иди. Шәрқий түркистанда хитайниң ирқий қирғинчилиқ сиясити башланғандин кейин уйғур мәсилисигә наһайити көп көңүл бөлгән. Уйғур ирқий қирғинчилиқ қарарини австралийә парламентида мақуллуқтин өткүзүшкә тиришқан парламент әзаси иди. Гәрчә бу қарар техичә чиқмиған болсиму буни чиқириш үчүн тиришчанлиқ көрситивататти. ‛мәҗбурий әмгәк қануни‚ниму австралийә парламентида оттуриға қойғаниди. Хитайниң дуняниң бихәтәрлики үчүн зор тәһдит икәнликини, һәр йәрдә, һәр сорунда җәсурлуқ билән оттуриға қоюп кәлгәниди. Техи яш иди, йүрәк кесили билән аләмдин өтүпту. Бу пәқәт австралийә сияситидики йоқитишла әмәс, бәлки австралийәдики шәрқий түркистан дәваси үчүнму зор бир йоқитиш. Биз дуня уйғур қурултийи болуш сүпитимиз билән мәрһумға вә аилисигә чоңқур тәзийәмизни билдүримиз”.

Бәхтияр бөрә әпәнди парламент әзаси, уйғурларниң йеқин дости кимбәрлй китчиң ханимниң уйғур дәвасиниң әң актип қоллиғучиси, шундақла хитайниң австралийәгә болған тәсирини тохтитиш үчүн изчил һалда күч чиқарғанлиқини оттуриға қойди.

Игилишимизчә кимбәрлй китчиң ханим австралийә парламентида уйғурларниң авази болупла қалмастин, австралийәдики уйғур тәшкилатлириниң паалийәтлиригә давамлиқ қатнишип уйғурларни қоллап кәлгән вә улар билән һәмкарлишип нурғун паалийәтләрни елип барған. Бәхтияр бөрә әпәнди бу һәқтә мәлумат бәрди.

Кимбәрли китчиң ханим 1970-йили 2-айниң 16-күни дуняға кәлгән. Униң кәспи адвокат болуп, 2016-йилидики сайламда әмгәкчиләр партийәсидин парламент әзаси болуп сайланған. У, викторийә штатиниң сенатори, йәни кеңәш палатаниң әзаси иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт