Д у қ ниң бирюсселдики паалийәтлири нәтиҗилик ахирлашти

Ихтиярий мухбиримиз әкрәм
2019-12-12
Елхәт
Пикир
Share
Принт

Д у қ 7-декабирдин 10-декабирғичә белгийә пайтәхти бирюсселда өткүзгән 3 чоң паалийәт нәтиҗилик ахирлашти.

Д у қ 12-айниң 7-күнидин 10-күнигичә явропа иттипақиниң мәркизи болған белгийә пайтәхти бирюсселда 3 чоң паалийәт орунлаштурған болуп, буниң бири 12-айниң 7-күнидин 9-күнигичә 3 күн давамлашқан «уйғур яшлирини таратқу билимлири билән тәрбийәләш курси» болди. Курста хәлқарадики тонулған ахбарат мутәхәссислири дәрс бәрди.

Хитайниң хәлқарани алдаш нийитидә елип бериватқан җаза лагерлири тоғрисидики сахта тәшвиқатлирини үнүмлүк ағдуруп ташлаш үчүн муһаҗирәттики яш таратқу һәвәскарлирини паал һәрикәткә кәлтүрүшниң бу йиғинниң асаслиқ мәқсити болғанлиқини тилға алған д у қ ниң рәиси долқун әйса әпәнди бу һәқтә тохталғанда яш курсантларниң бу қетимқи паалийәттин көп хурсән болғанлиқини әскәртти.

7-Декабирдин 9-декабирғичә «уйғур яшлирини таратқу билимлири билән тәрбийәләш» курсиға параллел һалда бирюсселда йәнә «д у қ иҗраийә комитетиниң 5-нөвәтлик йиғини» чақирилди. Йиғинға қурултай иҗраийә комитети тармиқидики һәрқайси комитетларниң 20 дин артуқ мәсуллири қатнишип, илгирики 6 айлиқ хизмәтлирини хуласиләп, кейинки 6 айлиқ хизмәт пиланлирини музакирә қилди.

10-Декабир күни явропа парламентида «шәрқий түркистан хитайниң тәҗрибәханисиму?» намлиқ илмий муһакимә йиғини өткүзүлди. Йиғинға явропа парламентиниң бир қисим әзалири, явропа парламентидики «уйғур достлуқ гурупписи» ниң әзалири, америка, канада, японийә, авистралийә, тәйвән, белгийә қатарлиқ әлләрдин кәлгән хәлқаралиқ кишилик һоқуқ тәшкилатлириниң мәсуллири, уйғуршунаслар, җаза лагерлири мутәхәссислири, бир қисим дөләтләрниң әлчилири, дипломатлар, мухбирлар болуп көп санда киши қатнашти.

Мутәхәссисләр йиғинда хитайниң шәрқий түркистан тупрақлирини атом синақлири елип баридиған, юқири техникилиқ назарәт системилирини синақ қилидиған, орган әткәсчиликиниң мәнбәси қилидиған бир тәҗрибәханиға айландурувалғанлиқини илгири сүрүшти. Долқун әйса әпәнди бу йиғинниңму тәсириниң яхши болғанлиқини тәкитлиди.

Бу қетимқи 3 паалийәткә 10 ға йеқин дөләттин вәкилләр келип қатнашқан болуп, д у қ ниң қазақистандики вәкили қәһриман ғоҗамбәрди әпәнди бу тоғрисида тохталғанда бирюсселда өткүзүлгән бу 3 йиғинниң һәр җәһәттин нәтиҗилик болғанлиқини илгири сүрди. Қазақистандики уйғур сиясий актиплиридин сәдирдинму йиғин´ға иҗабий баһа бәрди.

Мәлум болғинидәк, явропа иттипақи рәһбәрлири шәрқий түркистандики җаза лагерлири мәсилисини 2018-йилидин буян хитай билән болған диялог вә сөһбәтлиридә изчил тилға елип келиватқан болуп, шу йили 4-өктәбирдә җаза лагерлириға мунасивәтлик 15 маддилиқ қарар қобул қилған иди. Бу йил 10-ай вә 11-айда явропа парламенти явропа иттипақиниң әң алий мукапати болған «васлав хавел кишилик һоқуқ мукапати» һәмдә «сахароф әркинлик мукапати» ни түрмидики уйғур зиялийси илһам тохтиға бәрди. 16-19-Декабир күнлири йәнә явропа парламенти җаза лагерлири мәсилисини мәхсус музакирә қилиш алдида турмақта.

Д у қ ниң рәис вәкили, қурултай диний ишлар комитетиниң мудири, шәрқий түркистан өлималар бирликиниң муавин рәиси турғунҗан алавудун әпәндиму явропа иттипақиниң мәркизидә өткүзүлгән бу йиғинларға қарита өзиниң тәсиратлирини баян қилип өтти.

Пикирләр (0)
Share
Толуқ бәт