D u q 7-nöwetlik ijra'iye yighinida yéngi qararlarni maqullidi

Ixtiyariy muxbirimiz erkin tarim
2021.09.06
Share on WhatsApp
Share on WhatsApp
D u q 7-nöwetlik ijra'iye yighinida yéngi qararlarni maqullidi Dunya Uyghur qurultiyining torda ötküzülgen 7-nöwetlik ijra'iye komitéti yighini. 2021-Yili 5-séntebir.
RFA/Erkin Tarim

5-Séntebir küni dunya Uyghur qurultiyi 7-nöwetlik ijra'iye komitéti yighini ötküzüp, d u q ning qurulmisi bilen rehberlik hey'itide bezi islahatlar élip bérilghan yéngi qararni qobul qildi. Korona wirusi tüpeylidin sin körünüsh arqiliq chaqirilghan bu yighin'gha amérika, kanada, yaponiye, awstraliye, türkiye, qazaqistan, qirghizistan, en'gliye, shwétsiye, shwétsi'ariye, norwégiye, gollandiye, gérmaniye qatarliq 10 din artuq dölettin 30 neper ijra'iye hey'et ezasi qatnashti. 5-Séntebir küni bérlin waqti chüshtin kéyin 3te bashlan'ghan yighin'gha d u q ning mu'awin re'isi perhat muhemmidi ependi riyasetchilik qildi. Yighinda aldi bilen d u q re'isi dolqun eysa ependi söz qilip, 7-nöwetlik wekiller qurultiyining teyyarliq xizmetliri toghrisida qisqiche melumat bergendin kéyin, d u q ning qurulmisida we rehberlik qatlimida bezi islahatlarni élip bérishtiki meqset we bundin kéyin qilishqa tégishlik jiddiy xizmetler toghrisida melumat berdi.

Dunya Uyghur qurultiyining re'isi dolqun eysa ependi yighin axirlashqandin kéyin ziyaritimizni qobul qilip, d u q ning 6-nöwetlik wekiller qurultiyida özi re'islikke saylan'ghandin kéyinki 4 yil jeryanida Uyghurlarning éghir weziyiti, dunya weziyitining éhtiyaji we d u q xizmetlirining éhtiyaji tüpeylidin dunya Uyghur qurultiyining qurulmisida, rehberlik qatlimida bezi islahatlarni élip barmisa bolmaydighanliqini hés qilip, bu islahatni élip barghanliqini bayan qildi.

5-Séntebir küni tor arqiliq ötküzülgen d u q 7-nöwetlik ijra'iye yighinida qaysi yéngi qararlar maqullandi? bu heqte tepsiliy melumat igilesh üchün d u q ijra'iye komitétining mu'awin re'isi semet abla ependi bilen téléfon söhbiti élip barduq. U, aldi bilen bu yighinda muzakire qilin'ghan mesililer we maqullan'ghan qararlar toghrisida melumat berdi.

D u q nizamnamiside körsitilishiche, 3 yilda bir qétim qurultay chaqirip, saylam élip bérilidighan bolup, buninggha asasen ötken yil 11-ayda qurultay chaqirilishi kérek idi. Ijra'iye komitétining 6-nöwetlik yighinida bu heqtimu alahide muzakire élip bérilip, bu yil 11-ayning 12-künidin 14-künigiche chéxiyening piraga shehiride ötküzüshni qarar qilghanidi. Mezkur qarardin kéyin d u q ning aliy rehberliri arqa-arqidin yighin chaqirip, d u q ta bezi islahatlarni élip bérish arqiliq rehberlik hey'itide bezi özgirishlerni élip bérish we yéngi komitétlarni qurup chiqish toghrisida pikir birliki hasil qilghan. D u q ijra'iye komitétining mu'awin re'isi semet abla ependi élip bérilghan islahat toghriliq melumat berdi.

Igilishimizche, d u q 7-nöwetlik ijra'iye komitéti yighinida “Saylam komitéti” ning hazirdin bashlap d u q ning her qaysi rehberlik organlirigha özini namzatliqqa körsitidighan kishilerning iltimasini qobul qilsa bolidighanliqini jakarlighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.