Ghayib shopur ebuzer abbasning ghulja jélilyüzi qamaqxanisida ikenliki aydinglashti

Nöwette türkiyede yashawatqan nur'eli nuraxun ötken ayda radiyomizgha mehbus dadisi heqqide bergen guwahliq bayanatida, 24 yashliq newre akisi ebuzer abbasningmu buningdin 4 ay burun ghulja képekyüzidiki öyidin tutup kétilgenliki we ta hazirghiche nediliki we aqiwiti heqqide xewer yoqluqini melum qilghanidi. Muxbirimizning téléfon ziyaretliride, ebuzer abbasning 11 yil burun mehelle meschitining medriseside heptiyek oqughanliqi üchün tutulghanliqi we nöwette ghulja nahiyesining jélilyüzi qamaqxanisida ikenliki aydinglashti.

Türkiyediki bir alyumin zawutida inzhénér bolup xizmet qiliwatqan nur'eli nuraxun ötken ayda türmidiki dadisi heqqide radiyomizgha bergen guwahliq bayanatida, 24 yashliq newre akisi ebuzer abbasningmu 4 aydin béri iz-dériki yoqluqini qisturup ötkenidi. Déyilishiche, qurulush mashinisi yeni kiran heydep tirikchilik qilip kéliwatqan ebuzer abbas, namelum seweb bilen yérim kéchide öyidin tutup kétilgen. Nur'eli newre akisining nede tutup turuluwatqanliqi we aqiwiti heqqide uruq-tughqanliridinmu, tonush-bilishliridinmu uchur alalmighan.

Téléfonimizni qobul qilghan ghulja sheher képekyüzi saqchixana xadimi yéqinqi 4 ay ichide képekyüzining ara mehelle kentidin tutqun qilin'ghan kimler barliqini sorighinimizda, ebuzer qatarliq 4 kishi barliqini ashkarilidi.

Oqurmen teminligen

Képekyüzidiki özini ashkarilashni xalimighan yene bir alaqidar xadimning bayan qilishiche, ebuzer “Qanunsiz” diniy pa'aliyetlerge chétilip qalghanliqi üchün saqchilarda “Döletni parchilashqa urunush” gumani peyda qilghan. Uning buningdin 11 yil burun, yeni 13 yash waqtida, mehelle meschitidiki medrisede heptiyek ögen'genliki “Qanunsiz diniy pa'aliyet” dep qaralghan. Ötken yili ashkarilan'ghan toqquzaq saqchi arxiplirida, nurghun kishilerning buningdin 10-20 yil awwal ata-anisi yaki bowa-momisidin birqanche sa'et qur'an oqushni ögen'genliki üchün tutqun qilin'ghanliqi qeyt qilin'ghan. Mezkur alaqidar xadimning eskertishiche, ebuzerning “Qanunsiz” pa'aliyiti 2017-yili bayqalghan bolup, u chaghda ebuzer 18 yashqa toshmighachqa tutulmighan؛ u ötken yili saqchilarning “Tordin chüshüp qalghanlarni tazilash herikiti” de yézidiki bir türküm yashlar bilen birlikte tutqun qilin'ghan.

Képekyüzi saqchixanisidiki yene bir xadim, ebuzer abbasning bir mezgil képekyüzi saqchixanisida tutup turulghandin kéyin, ghulja nahiyesining jélilyüzi qamaqxanisigha yötkep kétilgenlikini ashkarilidi. U yene özining ebuzerning qolgha élin'ghanliqi heqqide uning a'ilisige xet chiqirip bergenlikini eskertti. Bu xadimmu ebuzerning döletni parchilashqa urunush gumani bilen tutulghanliqini delillidi.

Ötken yilqi éniqlashlirimizda ürümchide zulyar yasin qatarliq 10 nechche yashning burun türkiyede oqughanliqi üchün tutqun qilin'ghanliqi, bularningmu 2017-yili chong tutqun bashlan'ghanda yéshi 18 ge toshmighanliqi üchün tutqundin aman qalghanliqi melum bolghan. Emma ilgiri qeshqerdiki bir lagér saqchisi toqquzaqtiki lagérda 14 yashtin 80 yashqiche kishilerning barliqini melum qilghan. Bu uchurlardin qarighanda 2017-yili bashlan'ghan chong tutqunda yash ölchimining herqaysi jaylardiki siyasiy qanun emeldarlirining öz xahishi boyiche békitilgenliki we yaki yash ölchimining bezide tutqunda san toldurush üchün chetke qayrip qoyulghanliqi melum bolmaqta.