12 Нәпәр уйғур аял голландийәдики хәлқара валибол мусабиқисидә шуар бесилған ақ майка билән мәйданға киргән

Ихтиярий мухбирмиз азиғ
2022.09.29
Share on WhatsApp
Share on WhatsApp
12 Нәпәр уйғур аял голландийәдики хәлқара валибол мусабиқисидә шуар бесилған ақ майка билән мәйданға киргән 12 Нәпәр уйғур аял “хитай, ирқий қирғинчилиқни тохтат!” дегән инглизчә 4 сөз бесилған майкиларни кийип, голландийәдә өткүзүлгән хәлқаралиқ валибол мусабиқә мәйданиға киргән. 2022-Йили 28-сентәбир.
RFA/Azigh

28-Сентәбир күни, голландийәниң арним шәһиридә хәлқара валибол бирләшмиси тәрипидин орунлаштурулған дуня аяллар валибол лоңқисини талишиш мусабиқиси өткүзүлгән. Мәзкур мусабиқә җәрянида япунийә-хитай командилири оттурсида чимпийонлуқни талишиш мусабиқиси болуп өткән.

Бу мусабиқә җәрянида голландийәшәрқий түркистан тәшкилатлар иттипақи (Stichting Oost Turkistan Organisaties Alliantie) ниң орунлаштуруши билән 12 нәпәр уйғур аял “хитай, ирқий қирғинчилиқни тохтат!” дегән ингилизчә 4 сөз бесилған майкиларни кийип, мусабиқә мәйданиға киргән. Улар өзлириниң бу хил тинч шәкилдики һәрикити арқилиқ, хитайниң уйғурларға қаратқан ирқий қирғинчилиқиға қарши наразилиқини билдүргән.

Голландийәдә турушлуқ гүлистан ханим бу паалийәткә қатнашқан уйғур аяллириниң бири болуп, у бизниң бу һәқтики мәхсус зияритимизни қубул қилди. У өзлириниң бу хәлқаралиқ тәнһәркәт мусабиқисидә хитайниң уйғурлар үстидин елип бериватқан җинайи қилмишлирини аддий вә тинч усул арқилиқ дуняға аңлитишни мәқсәт қилғанлиқини билдүрди. У, гәрчә бу паалийәт мусабиқиниң ахириғичә давамлишалмиған болсиму, әмма өзлириниң “көзлигән мәқситигә йәткәнлики” ни тәкитләп өтти.

12 Нәпәр уйғур аял “хитай, ирқий қирғинчилиқни тохтат!” дегән инглизчә 4 сөз бесилған майкиларни кийип, голландийәдә өткүзүлгән хәлқаралиқ валибол мусабиқә мәйданиға киргән. 2022-Йили 28-сентәбир.

Шу күни голландийәдики уйғур аял паалийәтчиләрниң тинч шәкилдики бу наразилиқ билдүрүш паалийити мусабиқә мәйданидики аманлиқ сақлиғучиларниң тосқунлуқиға учриған. Аманлиқ хадимлири, уйғур аял паалийәтчиләрдин “хитай, ирқий қирғинчилиқни тохтат!” дегән шуар бесилған майкиларни дәрһал селивитишни тәләп қилған. Андин улар уйғур аяллири кийивалған бу майкиларни йиғивалған вә мусабиқә түгигичә қайтуруп бәрмигән.

Хәлқара валибол бирләшмиси соаллиримизға елхәт арқилиқ җаваб бәрди вә бу һәқтики әһвалларға қисқичә изаһат бәрди. Улар җаваб хетидә өзлириниң мусабиқә мәйдандики аманлиқ қоғдиғучиларни ишқа селип, уйғур аяллиридин майкиларни дәрһал селивитишни тәләп қилғанлиқини етрап қилған болсиму, әмма шуар бесилған бу бир йүрүш майкилариниң тартивелинғанлиқини инкар қилди.

Хәлқара валибол бирләшмиси бизгә қайтурған җаваб хетидә йәнә изаһат берип, өзлириниң бәлгилимә вә беләттики шәртлиридә мусабиқини көргүчиләрниң мусабиқә өткүзүливатқан мәйданда сиясий характерлиқ намайишларни өткүзүшигә йол қоюлмайдиғанлиқи, бу қаидиләрниң йәрлик тәшкиллигүчи комитет тәрипидин орунлаштурулғанлиқини ейтти.

Голландийәдә туғулуп өскән уйғур пәрзәнти әқидә савут зияритимизни қубул қилип, өзиниң мәзкур паалийәткә қатнишиш сәвәби тоғрисида тохталди. Әқидә савут йәнә мусабиқә мәйданидики аманлиқ сақлиғучиларниң хитайға қарши шуар бесилған майкиларни салдуривалғанлиқи вә мусабиқә түгигәнгә қәдәр қайтуруп бәрмигәнлики һәққидиму мәлумат бәрди.

Бу йил 3-июн күни түркийә пайтәхти әнқәрәдә өткүзүлгән түркийә-хитай дөләт командилириниң аяллар валибол мусабиқисидә, “ийи” партийәсиниң рәиси мәрал ақшәнәр ханим вә мәзкур партийәниң яшлар тәшкилати әзалири, мусабиқә мәйданиға шәрқий түркистанниң ай-юлтузлуқ көк байриқини асқан иди. Шу қетимлиқ мусабиқә җәрянида гәрчә хитай вәкиллириниң тәлипи билән аманлиқ хадимлири бу байрақни еливетишкә урунған болсиму, әмма мәрал ақшәнәр ханимниң чиң туруши билән ай-юлтузлуқ көк байрақ мусабиқә түгигәнгә қәдәр мәйданда есиғлиқ турған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.